ЭКОЛОГИЙ

Пӱнчер олмышто пӱнчерак лиеш

Республикысе чодыра озанлык пашам таче тӱҥ шотышто арендатор-влак шуктат манаш лиеш. Кеч тыглай еҥ-влак коклаште нуно чодыра руымо паша деч шийвундым ыштен налаш веле тыршат манын шонышат улыт. Чынжым гын, арендатор-шамыч коклаште шке жапыштыже чодыра паша дене кылдалтше сай шинчымашым налше, кӱкшӧ квалификациян специалист-влак улыт, южышт эсогыл ученый степенянат.

Мут толмашеш, ик тыгай арендатор предприятийын директоржо дене поснак палдарыме шуэш. «Кокшайский лес» ООО-м Алексей Ушнурцев вуйлата. Ялозанлык науко кандидат чодырам искусственно ончен куштымаште кугу специалист лийын шуын. Тыгак тудо эше Юл кундем кугыжаныш технологический университетыште чодыра культур, селекций да биотехнологий кафедрын доцентшылан ышта.

Тудын вуйлатыме предприятий Кокшайск лесничествын чодыра фондшын кумшо ужашыжым арендыш налын. Ятыр моло тыгаяк предприятий коклаште шагалынже ончыкылык чодыралан росотам ончен куштымо пашаште 1-ше класс качестван да икмынярже саемдыме урлыкаш нӧшмым гына кучылтеш.  Мутлан, тений саемдыме урлыкаш нӧшмӧ гыч ончен куштымо пушеҥге росотам 11 гектарыш шындыме. А тӱрысшӧ идалык мучко 60 гектарыште росотам вераҥдыме.

«Мом шылташ, пушеҥгым шукырак да шукырак руат, сандене у чодырам утларак шындыман, пушеҥгын урлыкшымат селекций йӧн дене саемдыман. А тидлан нӧшмыжын свойствыжымак саемдыман. Тунам пушеҥге озым вашке тырла,  вийым налеш, пужынат качествыже саемеш. Лач тыге Марий кундемысе чодыран генофондшым саемден кертына»,-  палемда ученый шкеже.   

Арендатор-влак чодырам руымо дене пырля тудым шындатат. Угыч шындыме чодыраланат вийым налаш полшат, тыште агротехникылан, ты озанлык сферыште у сеҥымаш-влаклан эҥертат. Сандене тыге ончен куштымо у чодыра нӧшмымат сай качестваным пуа. 

Арендатор-шамыч чодырам руымо паша деч кугурак парышым налаш тыршат гынат, тидын годым руымо верым ярам огыт кодо. Пример шотеш «Кокшайский лес» предприятийымак кондаш келшен толеш. Пӱнчер олмеш пӱнчерымак шындат манашат лиеш. Мутлан, 2007 ий гыч чылаже 830 гектар кумдыкышто у пӱнчерым ончен куштат. Илен-толын, тушто пӱнчӧ-влак у тукымым шке сынышт да тушто кушшо емыж-саска дене куандараш тӱҥалыт, палемда А.Ушнурцев.

 С.НОСОВА

Опубликовать в Одноклассники

Добавить комментарий