ПӰСӦ ЙОДЫШ

Пӧрт йӱла, тулым йӧрташ вӱд уке

19 июнь кастене сурт сомылкам кошартыме деч вара Волжский районысо Пезмучаш ялыште илыше Петровмыт еш пӧртыштыжӧ лийын. 20.50 шагатлан пошкудышт, капкам чот рӱзен, окнам кырен, «Суртышкыда тул пижын!» кычкырен, канышыштым лугыч ыштен. Ашнаш налме 17, 16, 10 да 7 ияш ныл шочшо ден вате-марий ӧрткымышт дене уремышке кӧжӧ чарайола, кӧжӧ носкийола куржын лектыныт…

Азапыш Сотнур, Пӧтъял да Шарача пожар частьла гыч кум спецтехнике пожарный бригаде-влак дене пырля лектын, но иктыже, Петровмыт деке миен шуде, Пезмучаш уремеш пудырген шогалын, молыжо писынжак толын огытыл гынат, сурт-печын ик велныже озаланаш тӱҥалше тулым йӧртен шуктеныт да вӱдлан каеныт. Иктыже тудым налын кертын, весыжлан пожар гидрантыште давлений ситен огыл.

– Пожар гидрантым «Вӱдканал» МУП обслуживатла. Районыштына тыгай сынан чыла устройство пашам сайын ышта, но… Тиде кечын шокшо лийын, сандене калык, мутат уке, башньысе вӱдым шукак кучылтын, да давлений чот волен, – умылыдымашым рашемдыш Волжский район администрацийын гражданский обороно да чрезвычайный ситуаций пӧлкажым вуйлатыше Евгений Антонов. – Тыгай годым спецтехнике вӱдым пӱя, эҥер але ер гыч налеш…

Но машина-влак вӱдлан Сотнур селашке кудалыныт да тидлан кӧра шуко жапым йомдареныт, манеш калык.

Шондык гай чапле сурт-печын, вӱташте, левашыште шогышо вольыкын, кайыкын шинча ончылнак йӱлен пытымыштым ужын, озавате ушыжым йомдарен йӧрлын. Йӧра эше иквереш кийыше документым луктын шуктеныт…

– Верысе индешымше классым тунем пытарыме деч вара Йошкар-Оласе медицине колледжыш документым наҥгаяш тарваныше Лена ӱдырнан сумкаште кийыше паспортшат йӱлен ыле… Шукерте огыл весым нале, – пич йӱкын мане Надежда аваже.

Кызыт Петровмыт Надеждан ачаж дене Кабаксолаште илат. Шочмо суртышто вер чылалан сита, но чон шке пєрт верч йӱдшӧ-кечыже шортеш.

– Тул пижме амалым эше огына пале, МЧС ик тылзе гыч веле каласаш лийын… Чылажланат ала-молан тыге лияш пӱрен вет… – озаватын логарже гыч комыля огеш кораҥ.

Тыге, вор мом нумал кертмыжым веле наҥгая гын, тул – чыла. Тыгай ойгыш логалшым моткоч сайын умылем: шкежат пожарлан верчынак шочмо сурт деч посна кодынам.

Чон коржын палемдем, кызыт Петровмыт гай азапыш логалше-влаклан верысе кучемлаште пешыже огыт полшо, тидыжым «бюджетыште окса уке» манын умылтарат. А вет нимо деч посна кодаш – ой-ой, Юмо аралыже!.. Кусараш лийдыме погым страховатлыме гын, йӧра эше…

Почешмут семын тидымат палемдынем: кызыт тулым йӧртымӧ южо спецтехнике шотанжак огыл. Теве, мутлан, майыште Печать пӧртна ваштареш верланыше кум пачашан пӧрт шеҥгеч ончыч шем шикш меҥгыла нєлталте, вараже тулат кояш тӱҥале. Пожарный машина-влак писын тольыч, но тиде кумдыкышто вӱдым налме икмыняр тавым шукерте огыл пыштыме асфальт дене петырымат, гидрантым кычалын, жапым мыняр-гынат йомдарышт. Тылеч посна ик спецтехникыжын шлангше шӱтлышӧ ыле, да вӱд, мутат уке, тул марте тичмаш куатын да ситышын миен ыш шу. Тыгак яллаште, селалаште верланыше пожар частьлаште дежурныйын йӱшӧ лиймыже да, тул пижмым увертараш шонышын телефон дене йыҥгыртымыжым колде, ласкан гына мален кийымыж шотыштат факт-влак улыт.

Икманаш, калыкшыланат тул дене моткоч шекланен пайдаланыман, тулэҥгекым чактарыше-шамычланжат эре ямде да тӱткӧ лийман, поснак – кеҥежым.

М.ИВАНОВА

Опубликовать в Одноклассники

Добавить комментарий