але Оласе-шамыч илыме верым шотышто кучаш полшышаш улыт мо?
«Ола кумдыкым тачысе илышлан келшышын тӱзатымаш» федерал программыш ушнен, общественный кумдыкым сӧрастарен уэмдыме дене Йошкар-Олан сынже палынак мотореште. Оҥай проект почеш ойыртемалтше вашталтышым илышыш шыҥдарымылан кӧра тений гына Чавайн бульварын, Сеҥымаш паркын да шуко моло верым уэмдыме ужашышт моторын койшо веле огыл, кызытсе илышлан келшен толшо лие. Калыкын тӱшкан каныме верыште, йолын коштмо шуко тыгай кумдыкышто асфальтым, а каналтен шинчыме теҥгыл тураште брусчаткым шарышт. Йоча площадке, йӧнан пеҥгыде теҥгыл, оҥай форман урно… Каныме паркыште, скверыште веле огыл, йӱштылмӧ верыштат Wi-Fi дене яра пайдаланаш йӧн ышталте. Кеҥежым ола кумдыкысо клумбышто пеледыш-влак сӧралын пеледыт, фонтан гыч вӱдтолкын «модын» йога. А вет тиде чылажат каныме верым эшеат саемдаш да тысе калыкым куандараш ышталтеш. Тӱшкан пайдаланыме кумдыкышто яндарак лийже манын, ола озанлык управленийын пашаеҥышт арулыкым кечын эскерат.
Шуктышаш сомылым шотлаш парнят ок сите
Тӱшкан пайдаланыме кумдыкым яндарыште кучымо сомыл ола администрацийын ик эн тӱҥ пашажлан шотлалтеш. Шуктышаш кугытшат изи огыл, шотлен лекме почеш парня-влакат огыт сите.
Кеҥежым Чавайн бульварым тӱзатен уэмдыме жапыште «Город» МУП-ын директоржо В.Дождиков дене вашлийын мутланыме годым мемнан пашаеҥ-шамычат тӱшкан пайдаланыме верым эреак яндарыште кучаш тыршат манын палемден коден ыле. Идалыкын чыла пагытыштыжат ола кумдыкым шотышто кучаш ты предприятийыште тӱрлӧ кугытан да функциян спецтехникыже ситышын: шӱкшакым опташ, лумым шӱкен чумыраш. Вет май пайрем да шыжым лум вочмо деч ончыч веле огыл эрыктыман. Каныме парк ден скверыште, ола уремыште, шуко пачашан пӧрт кудывечыште велше лышташым кора ҥдаш, телым лумым куаш, шошым корныш шавыме ошма йӧршан лавырам кораҥдаш, кеҥежым шӱкшакым ӱшташ, икманаш, идалык мучко ола кумдыкым шотышто кучаш – чынжымак, манаш гына. Тидлан технике, пашаеҥ-шамыч, окса ситышын кӱлыт.
Коммунальный озанлык пашаеҥын сомылжым ончалаш гын…
Арулыкым эскерыше дворниклан паркым, скверым, кугу площадьым, тротуарым кажне кечын ӱштман. Йӱр ма лум – кудалтен кодымо шӱкшакым, (а шукыж годым лачшымак тыге) эр эрденак ӱшташ, лумым куаш пешыже кӧ келша? Йӧра эше кидыш налме оксаже пашалан келшыше лиеш ыле гын? Изи пашадарлан ышташ кумылан еҥжат шагал да нуныжат тау шомакым шуэн колыт. Вигак ойлаш гын кызыт, дворник сомылым шукташ кӧ келша? Очыни, кредитым тӱлымылан кӧра окса чӱдылыкым пӱсын шижше, изи пенсий дене илаш тӧчышӧ, нелылыкыш логалын, паша верым муын кертдыме кокла ийготым эрталтыше але шоҥгыеҥ. Мом шылташ: иктаж-могай амаллан кӧра коммунальщик-влак шке пашаштым жапыштыже шуктен огыт керт гын, тидлан калык ончылно мутым кучаш логалеш.
Кумданрак 87-ше №-ан газетыште лудаш темлена
Р.ЧЕПАКОВА
