Шукерте огыл «Марий Эл» газетыштына «Марий тӱрын сылнылыкше» конкурсым иктешлен возымо ыле. Ты таҥасымашыш 59 еҥ ушнен. Лу сеҥышыш лекшылан организатор ден спонсор-влак сай пӧлекым кучыктеныт. Нунын радамыште «Марий Эл» газет редакцийнат лийын, да кокымшо пелийжылан Шернур район Чылдемыр ялыште шочын-кушшо ӱдыр Лиана Ивановалан электрон подпискым пӧлеклыме.
— Лиана, саламлена сеҥымаш дене. Ончыч айда лишкырак палыме лийына. Тый студент улат, тыге?
— Купран школышто 9 классым тунем пытарымеке Йошкар-Оласе медицине колледжыш шинчымашым погаш пуренам. Кызыт кумшо курсыш кусненам. Изи годсек врач лияш шоненам. Еҥлан пайдам кондаш, полыш кидым шуялташ кумыл эре лийын.
— «Марий Эл» газет – поро йолташет. Тиде ой дене келшет?
— Ковай деке Пӱнчерйымал ялыш уналыкеш мийымеке, ты сывыктышым кидышкем эреак налам. Еҥ-влакын илышышт нерген лудаш поснак келша. Оралте сӧрастарымымат эскерем. Газет гоч шочмо кундемнам сайынрак пален налаш лиеш.
Конкурсыш Дима Веденькинын темлымыж почеш ушненам. Мыйын шонымаште, тыгай йӧн калыкнан моторлыкшым да сылнылыкшым арален кодаш полша.
Сеҥышыш лекмемлан моткоч куаненам. Тиде мыйын ончыкылык илышемлан изи гынат, шӱкалтыш. Пеш кугу тау Дималан да «Марий Эл» газет редакцийлан.
— Мый палем, тый сылнымут дене кылым кучет…
— Школыштак тунеммем годым Россий, регион кӱкшытыштӧ эртаралтше тӱрлӧ сылнымут конкурсышто почеламутым лудмо дене шке усталыкем тергенам. Шуко вере сеҥыше радамыш лектынам. «Ямде лий» газет денат пеҥгыде кылым кученам. Почеламут, ойлымаш, йомак, мыскара-влакым возгаленам. Юнкор улам манам гын, йоҥылыш ом лий.
Марий шӱлыш, шочмо йылме, тӱвыра поянлык аралалт кодшо шонем. Тидланже мыят полшен кертам. Сандене колледжыште марий йылме дене эртаралтше конкурслаш уло кумылын ушнем.
Чылдемыр клуб пелен «Ший оҥгыр» ансамбльышке коштынам, марла кушташ, мураш тунемынам. Колледжыште эрталралтше пайремлаштат тиде моштымашем ончыктем.
— Яра жапым кузе эртарет?
— Спорт дене кылым кучем. Кеҥежым куржталам, телым ече дене коштам. Кумыл лекме семын тӱрым тӱрлем. Тидланже школышто технологий урокышто туныктеныт. Тиддеч вара ты кидпашалан кумылаҥынам.
— Тау! Тек чыла шонымашет шукталтеш.
— Тау!
О.МОШКИНА
