САМЫРЫК ТУКЫМ

Порым ышташ ийгот ок мешае

22 ноябрь гыч 15 декабрь марте республикыште «Поро паша еш марафон» акций эрта. Тушко Марий Турек, Медведево, Морко, У Торъял, Оршанке, Советский районла, Йошкар-Ола ден Звенигово олала гыч 107 еш ушнен. Эн шуко участник (37 еш) – Марий Турек гыч.

Кажне ешлан 99 волонтёр пашан маршрут кагазше пуалтын. Мом шукташ йӧнан, нуно шкеак ойырат. Тыге модыш формат семын кажне сомыллан балл пуалтеш. Сеҥышым 20 декабрьыште палемдат. Марафоным «Семейное добровольчество – территория возможностей» проект кышкарыште «Эр вий» йоча да самырык ушем организаций эртара. Модмашын вуйлатышыже – Маргарита Маланова.

Акцийыш ушнышо-влакын тачысе кече марте могай пашам шуктымыштым айста шкешт деч пален налына:

 Олеся Волкова, Марий Турек район:

– Мемнан еш командына кум еҥ гыч шога: мый да Виктория ден София ӱдырем-влак. Софиялан але кум ий веле гынат, поро пашам шукташ ямде. Викториялан – шым ий. Тыгай самырык тӱшкана дене вакансий спискыште шагал огыл йодмашым шуктенна. Книгагудышто, Мосолов лӱмеш тоштерыште лийынна, шырчыкомартам ыштенна, тушто-влакым чумыренна. «Мӧҥгӧ кайынем» акций кышкарыште «Динка» приютышто илыше янлык-влак нерген социал сетьлаште уверым шаркаленна. Лишыл жапыште нуно шканышт озам муыт гын, сай ыле. Тыгак начар тазалыкан йоча-влаклан канцелярий сатум наледенна. Ончыкыжым нунылан да илалше-влак пӧртыштӧ коча-кова-влаклан у ий открыткым ямдылаш полшаш шонена.

Татьяна Козлова, Оршанке район:

– Акций нерген ВКонтакте соцкылысе ик тӱшка гыч пален налынна. Тушко уло ешна дене (мый, пелашем да кум икшывына) ушненна. Таче кече марте маршрут лист почеш ныл поро пашам ыштен шуктенна: шырчыкомартам ыштенна, Оршанкысе Воин Чап тоштерыш миен толынна, шке ялысе йоча площадкым эрыктен шынденна, начар тазалыкан-влаклан пӧлеклалтше книгам лукташ марий да руш туштовлакым чумыренна. Марафон умбакыже шуйна. Сандене эше шагал огыл кӱлешан сомылым ыштен шуктена манын ӱшанем.

 Ольга Гвоздева, Марий Турек район:

 – Пытартыш жапыште волонтёр-влак нерген ятыр ойлат. Меат еш дене нунын радамыш ушнаш шонен пыштенна. Тыге верысе книгагудылан тошто книгам ачалаш полшенна, начар тазалыкан йоча-влаклан открыткым ямдыленна, «Динка» приютышто илыше янлык-влаклан кочкышым намиен пуэнна, шырчыкомартам ыштен, шке пакчашкына сакенна. Тоштерышкат миен толаш жапым муынна. Тыгай акцийлан кӧра шуко еҥ ден янлык полышым налыныт. Тидыже моткоч куандара. Ме кертмына семын полыш кидым шуялташ эре ямде улына.

О.МОШКИНА

 Фотом О.Гвоздеван еш альбомжо гыч налме

 

 

Опубликовать в Одноклассники

Добавить комментарий