Ончыкылык – программистын кидыштыже. Пытартыш жапыште IT технологийым палыше-влакым моткоч аклат. Гаджет-влак илышыштына кугу верым налыт, садланак нуным «умылен» моштышо деч посна огеш лий.
Таче лаштыкнан унаже – инженер-программист Геннадий Полатов. Рвезе Морко посёлкышто шочын-кушкын. Марий кугыжаныш университетын Физике-математике факультетыштыже тунемын. Кызыт «Газпром трансгаз Нижний Новгород» ООО компанийын Моркысо филиалыштыже пашам ышта.
– Геннадий, тый кызытсе жаплан келшыше профессийыште тыршет. Ала шке сомылет дене палдарет?
– Инженер-программист семын программе да системе-влакын шот да радам дене пашам шуктымыштым тергем. Иктаж компьютер але вес аппарат шалана гын, тудым олмыктем.
Технологий вашталтеш, уэмеш, тыге шинчымашым нӧлташ кӱлешлык лектеш. Паша йӧре у шинчымаш дене пойдаралтам. Тидлан сай йӧным командировко-влакат ыштат. Организацийын вес кундемласе филиалыштыже тыршыше-влак дене кылым ыштымеке у шӱлыш лектеш.
– Тый вет эше самырык-влак дене пашам ыштымылан вуйын шогет…
– Тыге. Ӱдыр-рвезе-влак шкеныштым ӱшанлын кучышт, лӱдмаш, ӧрмаш, ок кӱл шонымаш ынышт лек манын, шуко мероприятий ышталтеш. Вет пашашке куанен кошташ тӱҥалыт гын, лектышыжат сай лиеш. Ме организацийысе веле огыл, тыгак мер пашашкат чӱчкыдын ушнена. Школ ден йочасадлаш лектын коштына. Патриот шӱлышан урок-влакым эртарена, профориентаций манме сомылымат шуктена. Чап кӱм олмыктымаште тыршена. Начар тазалыкан еҥ, илалше, шуко икшыван еш-влаклан полышым пуэна. У ий але вес пайремлан пӧлекым ыштена, концертлаш ӱжмашым кучыктена.
– Тый денет шагал огыл мероприятийыште вашлийынна. Коеш, мер илышыш тый чӱчкыдын ушнет.
– Ик гана пырля тыршыше йолташем-влак дене «Унчо-fest» лагерь-семинарыш миенна ыле. Тушто мылам моткоч келшен. Марла мутланымыжан мом шога! Пашаште шочмо йылме дене шагал мутланена, шукынжо руш улыт. А тыглай вашлиймаш куандара. Тиде мероприятий чоныштем мер илыш деке кумылаҥдарыше тулым ылыжтен. Тудын деч вара икмыняр гана Марий самырык тукым слётыш ушненам.
Тыге коштын, мый шке пашамлан шуко уым налам. Организаций могырым шекланаш тыршем – келшышыжым, сайжым шотыш налам. У еҥ-влак денат палыме лиймын надырже кугу. Тыге мый шуко сай йолташым муынам. Нунын дене кызытат келшена, вашлийын мутланена.
– Программист лияш шонышо самырык лудшына-влаклан мом тыланен кертат?
– Сай программист шуко тунемшаш, вет компьютерын кӧргӧ чоҥалтмыжым, кузе пашам ыштымыжым чыла палыман. Тыгак писе, пашаче, чытыше лийман. Цифран технологий илышнан тӱрлӧ шӧрынжым авалтен. Садлан тиде профессий пайдале да ончыкыжымат шке кӱлешлыкшым ок йомдаре.
Каласен кодынем: IT дене кылдалтше паша – тиде сай, но чонлан лишыл шочмо тӱвыра, йылме нерген нигунам мондыман огыл. Тудым шымлыман да шке тукымлан арален кодымо верч тыршыман.
– Тау. Ончыкылык корнет волгыдо лийже.
– Тау.
О.МОШКИНА мутланен
