УВЕР ЙОГЫН

Пырля каҥашеныт, тунемыныт, иктешленыт

Медведево посёлкышто «Ялысе здравохранений. Кокла медицине шинчымашан специалист-влакын рольышт» теме дене республик кӱкшытан конференций лийын. Тудым Марий Эл Республикын Тазалыкым аралыме министерствыжын Кокла медицине пашаеҥ-влакын ассоциацийышт эртарен.

Конференцийын 340 утла делегатше регионысо тора яллаште медицине полышым пуымо йодышым келгын лончылен.  

Яллаште медицине полышым пуымо качестве нерген тӱҥ докладым регионын тазалыкым аралыме министрже М.Панькова ыштен. Диспансеризацийын кӱлешлыкше да тиде программым ялысе медик-влакын тыршымышт дене илышыш пуртымо нерген министерствын медицине профилактике шотышто тӱҥ специалистше Н.Чегаева каласкален. Республикысе онкодиспансерын тӱҥ врачше Е.Яковлева ракын вияҥаш тӱҥалмыжым ФАП да врач амбулаторий условийыште жапыштыже рашемдыме кӱлешлык нерген ойлен, а Йошкар-Оласе Вашкеполыш станцийын тӱҥ врачшым алмаштыше Е.Морозова ял калыклан медицине полышым организоватлыме паша нерген каласкален. Кокла медперсоналын пашашкыже пуртымо у формо да инноваций-влак дене Советский да Медведево районласе рӱдӧ эмлымверлаште тыршыше тӱҥ медсестра-влак Л.Трутникова ден Е.Косульникова, Республикысе онкодиспансерын тӱҥ медсестраже Т.Хорошавина, Сар-влакын ветераныштын республикысе госпитальыштын кугурак медсестраже-шамыч С.Одинцова ден О.Шевнина, Йошкар-Оласе Вашкеполыш станцийын фельдшерже Е.Зубарев палдареныт.

Ялла гыч толшо медик-влак Йошкар-Оласе медицине колледжын, Вашкеполыш станцийын, госпитальын да онкодиспансерын ончыктымо шӱм-шодо реанимаций да периферический манме вӱргорнын катетеризацийже шотышто мастер-классым кумылын онченыт.  

М.ИВАНОВА.

Опубликовать в Одноклассники

Добавить комментарий