Школ. Моткоч келге шонымашан мут. Шинчаончылно самырык, весела пагыт сӱретлалтеш, можыч, икымше йӧратымаш шарналтеш…
Туныктышо-влак ик выпуск почеш весым, пиалым тыланен, кугу илыш-корныш лукташ тыршат.
Мутем Волжский районысо Кӱсола кыдалаш школысо спорт тоштер нерген. Шуко еҥ деч тудын нерген колынам. Сандене ик кечын ты школыш миен, тушко пурен лекде шым чыте. Кызыт физкультур урокым туныктышо О.Бахтин пуртыш, мо-кузежым каласкалыш.
Тоштер ару, йоҥгыдо, мо кӱлешым раш пален налаш лиеш. Ик стенд район кӱкшытыштӧ ойыртемалтше спортсмен-влаклан пӧлеклалтын гын, весе – республик, элна кӱкшытыштӧ сеҥышыш лекше-шамычлан. Ожнысо арверымат конденыт. Тыгак тыште всесоюзный таҥасымашлаште вийым тергыше ӱдыр-рвезе-влакын результатыштым пален налаш лиеш. Тидлан посна альбом-влакым ямдыленыт. Иктым почат – пуйто футболист-влак коклаш логалат. Весым лоштыклет – спортын вес видше нерген шуко уым пален налат. Нунын сеҥыме кубок, пӧлекыштат уло. Ты школышто ятыр тале, чолга, ойыртемалтше спортсмен тунемын, кугу спортыш лач тыште негызым пыштен. Мутлан, тиде школышто тунемше-влак 1972 ийыште республикын чапшым футбол дене «Шӱштӧ мече» всесоюзный турнирыште араленыт. Чыла команде коклаште шымше верым сеҥен налыныт. Эн сай вратарьжымат лач ты школын тунемшыжым ойыреныт. Тудлан Чап грамотым, кубокым да шарнымашан пӧлекым, курчак-футболистым, пуэныт. Оҥай, но тиде курчакат (снимкыште) тоштерыште аралалтеш.
– Спорт тоштерым почмо дене моткоч чын ыштыме, шонем. Тышке пурет да школ илыш шарналтеш. Ме тунам жапым пеш пайдалын эртаренна, – ойла физкультурым туныктышо О.Бахтин. – Кызытсе самырык тукымлан мом ончыктышаш, кӧ нерген каласкалышаш еҥ, спортсмен-влак улыт.
Спорт музейым ты школышто физкультурым туныктышо, шинчымашым, кӱлешан ой-каҥашым пуышо, икшывын тазалыкше, уш-акылже верч тыршыше Г.Ефремов лӱмеш почыныт. Геннадий Васильевич (кийыме мландыже пушкыдо лийже) тыште 30 ий утла тыршен. Тудын нерген ача-ава, кугурак ийготан-влак поро мутым гына ойлат. Жап эртен, самырык тукым вашталтын, но… Тиде чолга, тале туныктышын пашаже ок мондалт.
Волжский муниципальный районысо ДЮСШ-штат директорлан ыштен. Шочынжо Курыкмарий районысо Ямангаш села гыч. Изинек спортым йӧратен кушкын. Армийыште куштылго атлетике дене заниматлен, чемпион лийын.
Геннадий Васильевичын 32 ий йоча-влак дене ыштыме жапыште ече, футбол, куштылго атлетике, баскетбол да волейбол дене 84 еҥ республикын, 167 еҥ районын чемпионжо лийын. 98 тунемше спортын тӱрлӧ видше дене икымше разрядым шуктен.
Тыште шуко тале спортсменын лӱмжым ужына. Тиде спорт ориентирований дене тренер О.Краснов, волейбол дене ялысе школ коклаште эртаралтше республик кӱкшытан первенствын сеҥышыже (1982 ий), «Пионерская правда» газетын призше верч таҥасымашын призёржо (2-шо вер, 1980 ий) А.Кузьмина, футбол дене всесоюзный зональный таҥасымашын (1972 ий) участникше, «Луч» командын икымше вратарьже В.Семёнов, ече дене спорт мастерыш кандидат, всесоюзный таҥасымашлан участникше Н.Фёдоров.
Е.Эшкинина.
Снимкыште: О.Бахтин спорт тоштерыште.
Авторын фотожо.
