СПОРТ

Лум возын, ечыгорно сымыстарен

Йошкар-Ола воктенысе «Корта» ече базыште Медведево посёлкысо кыдалаш школын ончычсо тренер-преподавательже Э.Лобановам шарныме лӱмеш ече дене таҥасымашке моткоч шуко спортсмен лектын.

Ийготым шотыш налын, кажне тӱшкалан посна стартым пуэныт. Игечыжат ечызе-влаклан келшыше лийын. Лум ситышын возын. Районла гыч ятыр еҥ толын. Ветеран-шамычат таҥасымашке кумылын ушненыт. Мутлан, кугурак ийготан-шамыч коклаште Морко районысо Арын кундем гыч куштылго атлетике дене спорт мастер В.Романов.

– Тений икымше гана ечыгорныш лектым. Ты видыште вием терген ончышым. Мый шкеже 65 ияш да тудын деч кугурак ийготан-влак коклаште вием тергем. Кызыт южо пенсионерже куржталына, таҥасымашлашке лектына. Жап пайдалын эртыже манын шонена. Тыге капкыллан куштылгырак чучеш. Адакшым йолташ-влакым ужын кутыраш сай, – шыргыжалын мане тудо.

Верысе профессионал-спортсмен-влак сай результатым ончыктеныт. Мутлан, ӱдыр-влак коклаште призёр радамыш И.Соловьёва, Н.Морозова, А.Романова, пӧръеҥ-влак коклаште Д.Чекулаев, С.Егоров, А.Сергеев логалыныт.

Ече дене Марий Эл чемпионатын черетан этапше 18 январьыште Шернур посёлкышто эрта.

11 январьыште Волжский районышто ече дене спорт мастер Т.Григорьеван призше верч таҥасымаштат ятыр участник вийжым терген.

Куштылго атлетике денат тӱрлӧ турнир эртаралтеш. Туштат мемнан землякна-влак таҥасат, сай результатым ончыктат. Эртыше каныш кечын Чуваш Республикыште куштылго атлетике дене всероссийский таҥасымаште Людмила Лебедева 3 километр кужытышто ший призёр лийын. Тыгак Егор Кузнецов (18 ияш марте) 800 метрыште кокымшо верым налын. Никита Чирков ты кужытыштак (20 ияш марте) кумшо лийын.

Е.ЭШКИНИНА

Авторын фотожо

Опубликовать в Одноклассники

Добавить комментарий