2 майыште Йошкар-Оласе «Дружба» стадионышто футбол дене Марий Элын кубокшо верч таҥасымаш стартым налын.
Ты кечын кум матч лийын. «Виктория» ден МКМ, ЗПП ден «Арсенал», «Русь» ден «Петъял», «Колос» ден «Спутник» модыныт. Килемар район гыч «Русь» ден Волжский районысо «Петъял» команде-влакын модмышт годым йӱр чарныде йӱрӧ, куржталме пасушто ночко да яклака лийын. Футболист-влаклан кылмашат, пӱжалташат сайынак логалын.
– Тыгай кӱкшытан турнирыште икымше гана выступатлена. Адреналин манмет лектеш. Ончаш толшо-влак кычкырат, сандене голым пуртымат, сеҥымат шуэш, – мане кокымшо матчыште соперникын капкашкыже икымше мечым пуртышо Волжский районын чапшым аралыше Юлиан Денисов.
– Тӱҥалтыште районышто модынна. Ныл ий почела сеҥенна. Тений адакат кубокым налынна, сандене республик кӱкшытыштӧ таҥасаш шоненна. Тиде мыланна ончыкылыклан пеш кугу опыт. Ик гана тыгай кӱкшытыштӧ вийым тергаш шоненна. Ала-куштыжо мемнан-влак сайынрак модыч, икымше голымат пуртышт, чылан сайын модаш тыршышт. Тӱҥалтышлан сеҥалтынна, но вес ийын сайрак лиеш, шонем, – ешарыш «Петъял» командын представительже Александр Михайлов.
– Мыят тидымак пеҥгыдемдем. Шукыштын ешышт уло, пашамат ыштыман, ялыште илыше-шамычлан шонымо семын ямдылалташ жап уке. Туге гынат сайын модынна, – йӱр вӱдым ӱштылын, ойла командын капитанже, тренерже Максим Васильев.
10 май деч вара Марий Элын кубокшо верч модмашын 1/8 финалыштыже «Звезда» (Советский), «Волжск» ФК, «Сокол» ФК (Шернур), «УОР-СШОР» (Йошкар-Ола), «Восход» (Красногорский), «Тарханово» ФК (Йошкар-Ола), «Знамя» (Параньга, Ондропсола), «РМТ» (Йошкар-Ола) команде-влак модыт.
Вашлиймаш-влак Йошкар-Оласе стадионлаштат, верлаштат эртат. Пелефинал июльышто лиеш гын, сеҥыше-влакым Йошкар-Олаште 10 августышто палемдат.
Таче кечылан Марий Элын кубокшын озаже – Волжск гыч «Волжск» ФК.
Е.Эшкинина.
