28-30 июньышто Шап ер да Чернушка посёлко воктене спорт ориентирований дене Юл кундем федерал округын первенствыже да чемпионатше эртен.
Тушко 14 регион гыч 700 наре участник чумырген.
— Спортсмен-влак палаткыште иленыт, шкеак кочкаш шолтеныт, — палемден тазалыкым пеҥгыдемдыме «Шап» комплексын вуйлатышыжын алмаштышыже Сергей Иванов.
Марий Элын ӱдыр-эргыже-влакат сеҥыше радамыш логалыныт. Кросс-спринтыште Ольга Сергеева, Ксения Харитонова, Александр Антонов, Николай Бахтин, Светлана Старцева эн тале лийыныт.
А кросс-лонг дисциплиныште Мария Куликова ден Тимур Мамедов сеҥышыш лектыныт.
— Тыште мыланнат, йоча-влакланат йокрок лийын огыл. Эрдене икшыве-влак таҥасымашке каеныт гын, ме, ача-ава-влак, да ик йоча черет дене кочкаш шолтенна, палаткым ороленна. Тиддеч посна Шап ер воктенат каналташ йӧн лийын, — ойла Татарстан Республикын рӱдолаж гыч толшо Лилия Зверева. — Демьян эргым ынде шым ий спортивный туризм дене кылым куча. Кок кече почела икымше ден кокымшо верым налын. Тиддеч ончыч ме Удмуртийыште лийынна, а тышечын Нижний Новгородыш кайышаш улына.
— Таҥасымаш кугу кӱкшытыштӧ эртен. Мылам тыште моткоч келшыш. Илыме палаткан оланат чодыра коклаште верланен, сандене яндар южышто шӱлашат куштылго, чонлан ласка. Конешне, изишак йӱр мешайыш, но нимат огыл, — воштылале Демьян. — Мыланна кас еда дискотекым эртареныт, тӱрлӧ конкурс лийын, оҥай приз-влак модылтыныт.
А.Байкова
Авторын фотожо