КАЛАСЕ, "МАРИЙ ЭЛ"

Пурен кертыт мо?

Пурен кертыт мо?

Мыйын разрешений деч посна полицийын пашаеҥже-влак пачерышкем пурен, тудым ончен лектын кертыт мо?

А.Николаев.

Медведево посёлко.

Йодышлан Медведево районысо прокурорын кугурак полышкалышыже О.В.Зарницына вашештен:

— РФ-н Уголовно-процессуальный кодексшын 12-шо статьяж ден келышышын, илыме верым полиций пашаеҥ-влак тушто илыше-влакын разрешенийыштым налмеке але судын пунчалже почеш гына ончен лектын кертыт. Но тидын годым кодексыште ончыктымо почеш 165-ше статьяште ончыктымо исключений уло. Южо случай годым, кунам илыме верым ончен лекме производствым эртараш пешак кӱлеш, тунам следователь але дознаватель судын пунчалже деч посна тидым ышташ пунчалым луктеш. Тидын годым следователь але дознаватель следственный действийым тӱҥалмеке, кум кече жапыште  производствым тӱҥалме нерген судьям да прокурорым шижтарен шуктышаш. Вара судья следственный ошкылым чын, чын огыл ыштымым терга да тудын законлан келшыше але келшыдымыж нерген пунчалым луктеш.

 

Ойырлымеке кузе лийман?

Икшыве-влак ойырлышо ава-ача дене посна- посна илат гын, алиментым кӧ деч да кузе тӱлышаш улыт?

Н.Макарова.

Йошкар-Ола.

Йодышлан  Медведево районысо прокурорын кугурак полышкалышыже О.В.Зарницына вашештен:

— Чынжымак, ойырлышо ава-ачан икшывышт иктыж да весыж денат кодын кертыт. Но тидын годым алиментым кузе тӱлымо нерген ойпидыш ончылгоч ышталтеш. Тыгай годым суд оксам кугурак пашадарым налше деч изирак пашадарым налшылан кӱрын лукташ палемда.

 Тиде окса кугытым суд икшывын ончыч окса шотышто кузе илымыжым шотыш налын  палемда. Тидын годым ава-ачанат материалный ден еш положенийыштымат шотыш налеш.

Но тыгаят лийын кертеш: алиментым кок йочаланат ава-ача кокла гыч иктыже гына тӱла. Варажым ты але вес икшывыже алиментым тӱлышо ава але ача деке илаш кусна. Тыгай годым тыгай ава але ача (ончыч алиментым  тӱлышӧ) районысо судыш алиментым иземдаш йодмашан искым пуэн кертеш, молан манаш гын алиментым кӱрын лукмо нерген йодышым лачшымак суд онча. Тидын годым судыш йочалан илаш у верым палемдыме нергенат йодмашым ыштыман.

Кӧ дене йоча илен, тудо авалан але ача, йочан вес вере илаш куснымекыже, алмиентым пӧртылтенат кертеш (алимент оксажым ава але ача кучылт пытарен огыл гын). Но ава але ача оксажым пӧртылташ тореш лиеш гын, тиде йодышым адакат суд гоч ончен лекташ йӧн уло.

С.Носова ямдылен.

Опубликовать в Одноклассники

Добавить комментарий