ТАЗАЛЫК

Поро кумыл акций: Тыгай тренажёр лиеш гын…

5 октябрьыште Республикысе йоча клинический эмлымверыште ВТБ банкын «Тӱня шинчавӱд деч посна» поро кумыл программыжын акцийже эртен. Банк тиде тӧнежын реабилитаций отделенийжылан кӱлешан оборудованийым налаш 1 500 000 теҥгем ойырен.  

«Налаш палемдыме тренажёр йоча церебральный паралич, инсульт да моло чер дене орланыше изи пациент-влаклан кошташ, тыгак капкылым рыҥ кучаш тунемаш кӱлеш. Тиде оборудованийын пашажым персональный компьютер виктара. Тыгай сынан вес оборудований Марий Элыштына уке, сандене йоча-влак комплексный реабилитацийым вес регионысо медицине рӱдерлаште эртат. Тренажёрым налме дене реабилитацийын тичмаш курсшым шкенан эмлымверыштак эрташ йӧн лиеш», – палемдыш Республикысе йоча клинический эмлымверын тӱҥ врачше Татьяна Бастракова.

Акцийын кышкарыштыже молгунамсе семынак весела пайремым ямдылен, мероприятийыш «Ласкан малыза, йоча-влак!» телепередачын персонажше-влакым да композитор, мурызо Владимир Щукиным конденыт. Изи пациент-влакым Буратино, Хрюша, Степашка да Каркуша оҥай выступленийышт дене куандареныт, пайрем мучаште кажне йочалан пӧлек шотеш юзо шондыкым кучыктеныт.

Ты гана йоча-влак деке эше тӱнямбал классын спорт мастерже, «Порсын корно — 2017» раллин ший призёржо, «КамАЗ-мастер» командын пилотшо Антон Шибалов толын. «Тӱня шинчавӱд деч посна» программыш ӱжмылан нимучашдымын тауштем. Мыланем тудо йоча-влаклан полшен, мондалтдыме куаным пӧлеклен кертме дене шергакан. Таче ме ик таҥасымашым веле огыл эртыше спортивный КамАЗ-ым да викториныште сеҥыше-влаклан пӧлекым конденна», – мане Антон.

«Тӱня шинчавӱд деч посна» программе 14 ий пашам ышта. Тиде жапыште тудо Российысе 52 регионышто Санкт-Петербург гыч тӱҥалын Камчатке марте 100 утла йоча эмлымверлан полшен.

М.ИВАНОВА.

Опубликовать в Одноклассники

Добавить комментарий