Мланде участкым назначений почеш от кучылт гын, тудым поген налын кертыт маныт. Тыгак мо?
Н.Крикунов.
Советский район.
Йодышлан Медведево районысо прокурорын полышкалышыже С.Захарова вашештен:
— РФ Граждан кодекс дене келшышын (284-ше статья) озан мланде участкыжым тунам поген налын кертыт, кунам тудо ялозанлык пашам ворандараш, илаш але моло оралтым чоҥаш ойыралтын, но кум ий жапыште тудо целевой назначений почеш огеш кучылталт. Но участке дене пайдаланаш закон дене келшышын кужурак пагыт палемдалтын гын, тудым поген налын огыт керт. Тиде кум ийыш участкым шотыш кондаш кӱлшӧ, тыгак участкым назначений почеш кучылташ йӧн лийдыме пагыт-влак огыт пурталт. Тыгак участкым палемдыме жапыште назначений почеш огыл кучылтмылан административно мут кучаш шогалтен кертыт.
С.Носова.
