СПОРТ

Писын куржталыныт, сайын таҥасеныт…

14-17 майыште Саратов областьысе Хвалынский районышто «Туриада-2019» спортивно-туристический лагерь эртен. Тыгай сынан таҥасымаш шымше гана лийын.

Проектын шонымашыже –  самырык тукымым таза илыш-йӱлалан кумылаҥдаш, нуным спорт туризм занятий гоч патриотизм шӱлышеш кушташ.

Йӱлаш пурышо мероприятийыш Юл кундем федерал округ гыч теният 700 наре участник чумырген. Марий Элын чапшым 37 еҥ арален. Ӱдыр-рвезе-влак молгунамсе семынак спорт, культур аланыште шинчымашыштым пойдареныт, туризм корнышто да вӱдыштӧ таҥасеныт. Нуно икымше кече гычак палаткан лагерьыште иленыт.

«Туриаде» – оҥай, пайдале да шкешотан мероприятий. Тушто тӱрлӧ сынан таҥасымашлан, творческий конкурслан, культурно-познавательный туризмлан поснак кугу тӱткыш ойыралтеш.

Тыгай лагерьым эртарыме жапыште  спорт туризм дене таҥасымаш тунемше-влак, паша коллективла, селаласе, армийыш кайышаш самырык-влак коклаште ик эн кӱлешан семын палемдалтеш.

Нунын кокла гыч элнан командышкыжат ойыралтыныт. Мутлан, Марий Эл гыч Ксения Мубаракшина. Ӱдыр визымше гана вийжым терген. «Йӱла почешат манаш келшен толеш, икмыняр ий почела ик эн тале регион коклаш логалына», – палемда тудо.

Марий Элын командыже икымше кечынак (йолын коштмо дистанцийыште) сай результатше дене ойыртемалтын: Михаил Тарасов икымше верым, Рустам Урдяков кокымшо верым налыныт, ӱдыр-влак коклаште Ксения Мубаракшина икымше, Екатерина Николаева ден Надежда Семёнова кокымшо лийыныт.

Шке кундем, культур, йӱла да поянлык  дене палдарыме презентацийымат оҥай семын палемдыман. Авторский муро конкурсат шукыштлан келшен.  Лагерь, чынжымак, туризмын ик эн кӱлешан йӱлажым илышыш шыҥдараш полша.

Чыла конкурсым иктешлен, команде-влак коклаште Марий Эл кумшо верыш лектын. Ме ӱдыр-рвезе, тренер-влакым шокшын саламлена.  

Е.ЭШКИНИНА.

 

Опубликовать в Одноклассники

Добавить комментарий