24 декабрьыште Йошкар-Олаште В.И.Ленин лӱмеш площадьыште Марий тӱвыра рӱдер рӱдолаште илыше йоча-влаклан марий ёлкым эртарен. Республикнан тӱҥ кожшо воктене икшыве-шамыч ик жаплан йомак тӱняш логалыныт. Нуным Агытан, Рывыж, Лум мӧчӧр, Теле модыктен-куштыктеныт. А весела Пылтик ден Кувылдик мыскара койышышт дене мӱшкырым кучен воштылаш таратеныт. Шушаш ийын озаже, пий, йоча-влаклан Йӱштӧ Кугыза деке корным ончыкташ полшен.
Лумӱдыр ден коча шкеныштым шуко вучыктен огытыл, нунын дене пырля икшыве-шамыч ятыр модыш ден модыныт. Поснак шукыштлан Йӱштӧ Кугызан кидым, шӱргым, пылышым, нерым кылмыкташ тӧчымыжӧ келшен, молан манаш гын коча юзо тояж деч шылын шуктыдымо ӱдырым але рвезым муралташ, кушталташ, почеламутым каласкалаш але оҥай заданийым шукташ йодын. Модмашке кугыеҥ-шамычат ушненыт, сандене кож йыр чумыргышо-влаклан ик пырчат йӱштӧ лийын огыл. Чыланат пырля веселитленыт. Тыгодым коча иктымат пӧлек деч посна коден огыл, кажнылан тамле сийым , а поснак ойыртемалтшылан модыш машинам, курчакым да вес шергакан арверымат пӧлеклен.
Мучаште йоча ден ача-ава-влак йомакысе герой, Йӱштӧ Кугыза, Лумӱдыр ден пырля шарнаш кодшо фотом войзеныт.
— Мыланна марий ёлкышто моткоч келшен. Ме уло класс дене тышке толынна, ӱшанена тыгай пайрем кажне ийын эртаралташ тӱҥалеш, молан манаш гын уремыште, яндар южышто, модаш пайдале да пеш весела, — мане Йошкар-Оласе 20-шо №-ан школышто 1 «а» классыште тунемше А.Николаев.
А 29 декабрьыште тений тунеммаште ойыртемалтше икшыве-влаклан Марий тӱвыра рӱдер республикысе Курчак театрыште йӱлаш пурен шушо марий ёлкым эртара. Тушто эн оҥай костюмым чийыше, эн мотор модышым але открыткым ыштыше йоча-влакым пӧлек вуча.
Марий Элын ӱдыр-рвезыже-шамыч, 8 гыч 14 марте ияш 27 йоча, тыгак Кремльысе ёлкышкат каеныт. Тудо таче, 26 декабрьыште, эрта. Элнан тӱҥ ёлкышкыжо республикысе, регион кокласе, российысе олимпиадылаште сеҥыше, тӱрлӧ конкурсышто, фестивальыште, спортышто усталыкым ончыктышо икшыве-шамыч погыненыт. Марий Эл гыч тыгай йоча-влаклан У ий пайремыш каяш пиал шыргыжалын: сарыште але паша порысыштым шуктымо годым колышо ача-ава-влакын йочашт, йочапӧртыштӧ, школ-интернатыште илыше, шуко шочшан да социально аралалтдыме ешла гыч икшыве, «визытанлан» тунемше да олимпиаде ден конкурслаште сеҥыше.
Тыгак 29 йоча Юл кундемысе федерал округын ёлкышкыжат каен. Тудат таче, 26 декабрьыште, Нижегородский кремльыште эрта. Тушко Кремльысе ёлко семынак тӱрлӧ конкурсышто, олимпиадыште усталыкым ончыктышо, тулык, шуко шочшан ешла гыч икшыве-влак ушненыт. Нуно кож йыр модын коштмо деч вара Нижний Новгород олам ончат, Г.Гречко лӱмеш планетарийыште лийыт.
Л.ШАБДАРОВА.
М.Скобелевын фотожо.
