Тышке я тушко каяш кӱлмӧ годым пытартыш жапыште шукынжо «BlaBlaCar» приложений, соцкылласе «Попутчики» сынан лаштыкла гоч машинам кычал муын, палемдыме верышкышт каяш тыршат. Но чылаж годымак огыл шонымо семын лектеш.
Мутлан, кодшо кечылаште Йошкар-Ола гыч Москвашке каяш тарванымыж годым ик пӧръеҥ тыгак «BlaBlaCar» гоч каяш шонен да… 2,5 тӱжем утла теҥгеж деч посна кодын. Тидын нерген 39 ияш пӧръеҥ шкеже полицийыш йыҥгыртен каласен.
Полицейский-влак рашемденыт: тудо интернетыште «BlaBlaCar» приложений гоч Йошкар-Ола гыч Москвашке такси дене каяш лийме нерген увертарымашым ужын. Тунамак тидын дене пайдаланаш кумылан улмыж нерген палдарен. Возымыжлан ӱдырамаш вашештен да, ончыктымо ссылкышке пурен, оксам ончылгоч колташ йодын. Пӧръеҥ тыгак ыштен. Тыгодым тудо банк картшын реквизитшым да смс дене толшо кодымат колтен. Тылеч вара счетшо гыч кок гана оксаже «ӱштылалтын». Тыге пӧръеҥ чылаже 3 тӱжем наре теҥге оксаж деч посна кодын.
Молан тыге лиймым умылыде, тидын нерген ӱдырамашлан возен колтен. Тудыжо технический поддержке манмыш увертараш кӱштен. А шкеже тылеч вара «йомын». Тунам гына пӧръеҥ ондалалтмыжым умылен да полицийыш йыҥгыртен.
Тиде факт шотышто уголовный делам тарватеныт.
Марий Элысе МВД шижтара:
· сатулан да услугылан сайын палыме ресурсла гоч гына онлайн тӱлыман;
· смс-ыште ончыктымо ссылкыш пурыман огыл;
· интернет-страницылаште мом да кузе возымым шекланыман. Тушто йоҥылыш-влак улыт да келшен толдымо мут-шамыч кучылталтыт гын, тиде мошенник-влакын сайтышт лийын кертеш.
«BlaBlaCar» приложенийыште келшыше машинам кычалме годым ондалалташ огыл манын, полиций пашаеҥ-влакын темлымышт почеш теве мом ончыман да тӱткышым ойырыман, мошенник-шамычын чояланаш тӧчымыштым теве кузе рашемдаш лиеш:
— профильым шукерте огыл регистрироватлыме;
— водительын фотографийже уке але олмешыже иктаж-могай сӱретым шындыме;
— увертарымаш эн ончыч лекше манын, корнылан эн шулдо ак палемдалтеш;
— водительын кузе кудалмыже, тидлан могай акым пуымо нерген еҥ-влакын возгалымашым тудо чат гыч мессенджерыш кусараш темла;
— кудалмылан пассажир-влак деч оксам ончылгоч тӱлаш йодыт.
Л.КАМАЛЕТДИНОВА
