Рӱдола
Рӱдола: таче да эрла
Эше ик ужар тул
28 июньышто Киров ден Воин-интернационалист-влак уремла ушнымаште светофорым уэмденыт, тушко ешартыш стрелкым вераҥденыт. Тудо Тыныслык урем велым Киров урем дене Ленин проспект могырышкыла кудалме годым Киров урем гыч пурлашкыла, Воин-интернационалист-влак уремыш, савырнаш сигналым пуа. Ешартыш ужар стрелкым вераҥдыме Киров уремыште транспортым шагалемдаш полша, поснак эрдене, автомобиль-влакын пеш шуко лиймышт годым.
Ушештараш уто огыл: корнышто коштмо правил дене келшышын, ешартыш стрелке чӱкталтме годым савырнаш ямдылалтше водитель-влак, ужар светофор чӱкталтмеке, тӱҥ корно дене кудалше-влаклан корным пуышаш улыт.
Аярлан — уке вер
26 июньышто, Наркоманий да наркобизнес дене кучедалме тӱнямбал кечын, полицейский-влак Йошкар-Ола администрацийын, илыме верым виктарыше компанийлан еҥышт да самырык чолгаеҥ-влак дене пырля пӧрт пырдыжлашке закон дене келшыдымын вераҥдылме наркотикым ужалыме нерген рекламым кораҥдымашке виктаралтше рейдым эртареныт.
Самырык-влак полат пеленсе доброволец-влакын республиканский школын волонтержо-влак ончылгоч могай пӧрт пырдыжыште пайдаланаш чарыме веществам ужалыше интернет-кевытын лӱмжым, кылым ышташ телефон номерым возымым рашемденыт, нунын спискыштым ыштеныт, а вара тыгай верлам пырля чиялтеныт.
Е.Садовин.