Марий Эл тӱвыра, печать да калык-влакын пашашт шотышто министрын алмаштышыже Г.Ширяева Пермь оласе марий рӱдерын чолга еҥже-влак да тудын председательже Р.Попова дене вашлийын. Тушто тыгак администрацийысе мер кучем да калык-влак кокласе кыл шотышто виктемжын калык да конфессий-шамыч шотышто пӧлкажым вуйлатыше А.Игнатьева лийын.
Раиса Попова рӱдерын пашаж дене кумдан палдарен, марий-влакын Пермьысе кугыжаныш национальный шымлыше университетын учёныйжо-шамыч дене вашлиймаш нерген каласкален. Тудыжо Суксун район Кызганде ялыште эртен. Тушко погынышо-влак верысе самодеятельный коллектив-шамычын мастарлыкышт дене палыме лийыныт.
Тидын деч вара Галина Степановна тений Марий Элыште эртаралтше тӱҥ мероприятийла нерген каласкален. Мутат уке, тудо Морко район Унчо ялын 2019 ийыште финн-угор тӱнян тӱвыра рӱдерышкыже савырнымыже да тушто йӱла дене кылдалтше пайрем-шамычын эртымышт да шуко моло событий дене палдарен. Верысе чолга еҥ-влаклан марий культурым арален вияҥдыме пашаштышт сеҥымашым тыланен да вуйлатышыштлан «Этнотӱр-влак» альманахым да эше икмыняр книгам кучыктен. А Р.Попова уналан «Пермьысе марий-влак: историй да тӱвыра» книгам пӧлеклен. А.Игнатьеван палемдымыж почеш, Пермьысе марий рӱдер чыла вереат чолган пашам ышта.
Тиде вашлиймаштак Пермьысе национальный шымлыше политехнический университетысе химико-технологический факультетшын магистратуржын студентше А.Николин Россий калык-шамычын Самырык-влакын ушемышкышт пураш конкурсышто вийжым терген да кертын! Погынышо-влаклан тудо увертарен: тыгай конкурс нерген тудо ВКонтактыште Игорь Эштуков деч пален налын да ушнен. Александрым палемдыде ок лий, тудо Пермьысе марий молодёжьын чапшым Россий кӱкшытан мероприятийлаште ик гана веле огыл арален, олаште Самырык-влакын тӱнямбал рӱдерым почшо паша группышто тыршен, Суксун район Сулий гыч Кугу Отечественный сарын ветеранже А.Александров нерген документальный фильмым шочыктен.
Погынышо-влаклан мастарлыкым верысе «Памаш» ансамбльын участникше-шамыч С.Кулаева, Л.Кузнецова, Е.Грымова, А.Киткаев, А.Николин, О.Романов ончыктеныт, концерт програмымыштышт марий муро-влакат лийыныт.
Вашлиймаште тыгак марий рӱдерын активистше, СССР-ын самбо дене спорт мастерже, самбо дене мастер-влак коклаште тӱнямбал чемпион Леонид Паркачев лийын. 2002 ий гыч тудо Пермь администрацийысе физический культур да спорт комитетын полшымыж дене марий калыкын эргыже, тӱнямбал классан спорт мастер, тӱнямбал кубокым сеҥен налше Лев Паркачёвым шарныме лӱмеш самбо дене кучедалмаш турнирым эртара.
Вашлиймаш моткоч кӱлешан да оҥай лийын. Палемдыман, тудо Пермь кундемысе губернаторын администрацийже полшымыж дене «Губерния» Калык усталык пӧртыштӧ эртен. Ты кечын Галина Ширяева тыгак Юл кундем федерал округысо субъектлаште этноконфессиональный кыл сферыште пашам ыштыше вуйлатыше-влак дене семинар-совещанийыште лийын.
Р.Попова,
Пермь оласе марий рӱдерын председательже.
Г.Кожевникова ямдылен.
