Тыгай ойыртемалтше лӱман ончер кодшо кечылаште Марий Турек поселкысо краеведений тоштерыште почылтын.
Выставкылан шке коллекцийже гыч эн шуко вуйчиемым Эҥербал ялыште илыше Мухтар Галиуллин конден. Тудын икымше экспонатшылан — 24 ий. Тиде – Ципья олаште налме тюбетейке. Кызыт пӧръеҥын тӱрлӧ элла гыч кондымо чылаже 20 утла вуйчиемже уло. Утларак ужашыже — лишыл еҥже-влакын пӧлекышт. Тачысе кечылан экспонатше-влак коклаште еврей кипе, араб куфий, турецкий феске, ковбой шляпа, чеченский пяс, нон… улыт. Пытартышыжым Мухтар Маулекиевичлан Вьетнам гыч конденыт.
Ончерыште, мутат уке, моткочак шуко ӱдырамаш шляпам ужаш лиеш. Тиде, мутлан, федора, тулья, канотье…
А могай гына профессионал вуйчием уке?! Врачын упшыжо, поварын колпакше, пожарныйын шлемже, каскыже, военнослужащийын фуражкыж ден беретше, эсогыл почетный караул салтакын фуражкыже…
Ешартыш семын выставкыште Марий Турек район кумдыкышто илыше ныл тӱрлӧ калыкын национальный костюмжо ончыкталтын. А тушко вуйчиемат пура. Сандене ончерыште руш-влакын повойник манме упшыштым да шовычыштым – убрусым, марлан кайыдыме татар ӱдыр-влакын калфакыштым, удмурт-шамычын сюлыкыштым – шовыч-покрывалым але вес семынже сӱан покрывалым да марий шымакшым – ужаш лиеш.
Выставкыш чылаже 100 утла экспонатым чумырымо. Нунын кажныштын – шке оҥай историйышт…
Л.КАМАЛЕТДИНОВА
Фотом тоштерын архивше
гыч налме
