Тений кеҥежым Звенигово олаште «Где у Волги середина» фильмым войзеныт.
Кинофильмым ышташ Звенигово ола гыч Максим Исманов, краевед Михаил Хорьков да оласе краеведений тоштерын пашаеҥже-влак Виктор Музуров ден Альберт Максимов шонен пыштеныт. Ончыч нуно олан да эҥерын историйышт дене кылдалтше материалым чумыреныт. Тӱҥ шотышто лоцман карт-влакым шымленыт. Кушто Звенига эҥер йоген, ола пелен мыняр кӱсото лийын да моло йодышланат вашмутым кычалыныт. А вара фильмым войзаш режиссёр семын Денис Шаблийым ӱжыныт.
Фильмлан Звенигово оласе ныл локацийым да тудын воктенысе кумдыклам кучылтыныт. Олан историйже дене палдарыше документальный фильмын сценарийжым редактироватлымашке историй науко доктор, академик Валерий Патрушев, историй науко кандидат, МарНИИЯЛИ-н вӱдышӧ шанче пашаеҥже Сергей Свечников ушненыт. Нунын да краевед, архив пашаеҥ-влакын ойлымыштым фильмыш пуртымо. Сандене кинопашаште ончыктымо факт-влак чын лийше улыт манын шонаш чыла амал уло.
Режиссёр тушко актёр-влакын модмо пашаштымат пуртен. Тӱҥ роль-влакым Йошкар-Олаште мероприятий-влакым эртарыше Евгений Лежнин ден самырык ӱдыр Ксения Окунева модыныт. Ксения вес марий режиссёр Андрей Огородниковын «Евсеев: признание ценою в жизнь» фильмыштыже модын шуктен.
Сюжет почеш кугу ола гыч толшо бизнесмен Марий кундемын ик верже дене палыме лийын коштеш.
Кызыт фильмым монтироватлыме паша кая. Тудым шыже мучашлан ончыкташ ямдылен шуктышаш улыт.
Светлана Носова
Снимкыште: фильмым войзымо годым.
Фотом фильмын воткыл лаштыкше гыч налме.
Театрыштат, киноштат модеш
