20-22 майыште элнан йӱдвел рӱдолаштыже икымше этнофорум эртен.
Российысе науко академийын Санкт-Петербургысо пӧлкаштыже да Петр Великий лӱмеш Антропологий да этнографий тоштерыште кум кече жапыште тидлан пӧлеклалтше пленар заседаний, панельный дискуссий, кидпаша мастер-класс-влак да этнопроект ярмиҥга эртеныт. Форумыш элнан регионлаштыже илыше тӱрлӧ калыкын еҥже, шанчызе, политик, мер пашаеҥ, предприниматель-влак чумыргеныт.
Кокымшо кечынже Кунсткамерын Имперский залыштыже регионла гыч мийыше участник-влак шкеныштын тоштер, образовательный, кидпаша да этнотӱвыра проектышт дене палдареныт.
Марий Эл гыч тушко Тимофей Евсеев лӱмеш национальный тоштерын этнографий пӧлкажым вуйлатыше, историй шанче кандидат Надежда Васканова миен. Тудо шкенжын «Самырык-влакын этнолабораторийышт» проектше дене палдарен. А кидмастар Евгения Кошкина шке ыштыш-кучышыжым ончыктен веле огыл, тудым спикер семынат тушко ӱжыныт. Шке воткыл лаштыкыштыже тудо тыгерак серен:
«Логалат тыгай мероприятийыш, кушто ученый-этнограф, шымлызе да творческий еҥ-влак погенат, да у кумылым налат. Тушто йӱла-влак нерген шуко ойлалтын. Южгунамже ӱчашымат. Уло кумыл дене шке пашаштым ыштыше-влакын йӱлышӧ шинчаштым ужат. Тыгай годым умылет: тый шкет отыл. Мом тый ыштет – чыла кӱлеш. Лач тыгай шонымаш мыйым Петербургысо форумышто авалтен. Угыч у вий, шонымаш дене пашам ыштыме шуэш».
– Этнопроект ярмиҥга тыгай кугу лиеш манын ме, форумын организаторжо-влак, шоненат огынал. Тушко ушнаш шонышо 300 наре йодмашым налынна. Сандене тыгай этнофорумым эртарыме йӱлам шуена», – палемден ТАСС-ын пресс-конференцийыштыже науко академийын научно- организационный пашаж шотышто директор Татьяна Киссер. Мероприятий Российысе калык-влакын икоян улмо идалык кышкарыште лийын.
Снимкылаште: форумын участникше-влак коклаште Надежда Васканова (пурла гыч – икымше) ден Евгения Кошкина (шола гыч – икымше).
Фотом Т.Евсеев лӱмеш национальный тоштерын воткыл лаштыкше гыч налме.
