24 ноябрьыште Москваште Марий Эл вуйлатыше Александр Евстифеев ден РФ-н чоҥымаш да илыме вер ден коммунал озанлык министерствын у вуйлатышыже Ирек Файзуллинын вашлиймашышт эртен.
Тудо — республикын социально-экономический вияҥмаш индивидуальный программым шуктымо шотышто регионын кураторжо. Нуно программын икымше лектышыже да лишыл жаплан, тыгак икмыняр ийлан план нерген мутланеныт.
Марий Эл вуйлатышын каласкалымыж почеш, индивидуальный программын кажне пунктшо шотышто паша чулымын ышталтеш. Кугу тӱткыш транспорт да социальный инфраструктурлам вияҥдаш, инженер да коммунал сеть-влакым уэмдаш ойыралтеш. Тыгак нацпроект-влакым илышыш шыҥдарымашат тидым ышташ полша.
Марий Эл вуйлатыше ден Россий Минстрой вуйлатыше «Юлым тазаҥдарымаш» федеральный проект дене келшышын «Экологий» нацпроектым илышыш пуртен, республикыште очистной сооружений-влакым чоҥымо нерген радамлын мутланеныт. Александр Евстифеевын палдарымыж почеш, тиде тылзын, ноябрьыште, икымше объектым – Марий Турек районышто тыгай сооруженийым – пашашке колтымо. Черетыште – Козьмодемьянскыште чоҥалтше очистной сооружений. Тудо декабрьыште пашам ышташ тӱҥалшаш.
Вашлиймаште тыгак «Илыме вер да оласе кумдык» нацпроектым илышыш пуртымо йодышым каҥашеныт. 1 ноябрьлан налмаште, Марий Элыште 300 тӱжем квадрат метр наре илыме верым чоҥымо. Ты шотышто план деч почеш кодмаш огеш палдырне. Тыгак аварийныйлан шотлалтше илыме фондлам пытарыме шотышто паша радам дене келшышын ышталтеш. Палемдыме показатель-влак шукталтышт манын, «Переселение граждан из аварийного жилищного фонда на 2019 — 2025 годы» республиканский адресный программым пеҥгыдемдыме. Тушко 2017 ий 1 январь марте аварийныйлан шотлалтше шуко пачеран 400 пӧртым пуртымо.
Тидын дене пырля еҥ-влак шкештат пӧртым чоҥат. Мутлан, «Стимул» программе дене келшышын, Апшакплак ялыште шуко шочшан еш-влак мланде дене ятырынрак пайдаланаш тӱҥалышт манын, автомобиль корным умбакыже ыштат.
Российын чоҥымаш да илыме вер ден коммунал озанлык министрже ушештарен: 2020 ийыште яллаште илыме верым налаш виктаралтше программе илышыш пурталтын. Тудын дене келшышын кредитым 3 процент марте льготный ставке дене налаш лиеш. Тидыже еҥ-влаклан илыш условийыштым саемдаш да изирак илем-влакым вияҥдаш шӱкалтышым ыштышаш. Ты программым республикыште чолган шуктышашлан паша Россельхозбанк дене пырля ышталтеш.
Вашлиймаш мучаште Александр Евстифеев Ирек Файзуллиным унам моткочак ончен моштышо марий кундемышкына толаш ӱжын да республикын социально-
экономический вияҥмаш индивидуальный программыжын илышыш кузе пурталтмыж дене шканже палыме лияш, нацпроект-влак почеш чоҥалтше объектлашке миен толаш темлен.
Марий Эл Республикым вуйлатышын организаций да
аналитике виктемжын уверже-влак негызеш
Л.КАМАЛЕТДИНОВА ямдылен
