Параньгасе строительно-технологический техникумышто профессионал мастарлыкыым ончыктымо «Профессийыште эн сай» конкурс эртен.
Тиде гана ссузын тунемшыже-шамыч деч посна мастарлыкым Параньга поселкысо, Матародо, Олор школлаште тунемше ӱдыр-рвезе-шамычат ончыктеныт. Сай деч сайжым «Повар», «Тракторист», «Кермычым оптышо», «Электромонтер», «ЭВМ оператор» номинацийлаште акленыт. Конкурсант-влакын таҥасымышт жапыште ончаш толшо-шамыч волейбол, армрестлинг да ӱстембал теннис дене соревнованийлаште вийыштым тергеныт.
Школышто тунемше-влак коклаште эн сай повар Параньга поселкысо школ гыч Валерий Ельшов лийын. Матародо школын тунемшыже Никита Мельников «ЭВМ оператор» номинацийыште ойыртемалтын. Олор школ гыч Кирилл Колесников «Тракторист» номинацийыште икымше верым налын.
Студент-влак коклаште Савия Самигуллинан кочкышыжо жюрин кумылжым савырен. Кермычым Динар Сайфутдинов ден Андрей Максимов эн сайын оптеныт. «Электромонтер» номинацийыште Ришат Файзрахманов ден Роман Васильев ончылно лийыныт. «ЭВМ оператор» номинацийыште Рамиль Газизов икымше вер дене палемдалтын.
Л.ШАБДАРОВА.
