Йошкар-Олаште школышто тунемше-влаклан республик кӱкшытан «Мунло» уш-акыл марафон эртен. Тудо Марий Эллан 104 ий теммылан да Ешын идалыкшылан пӧлеклалтын.
Таҥасымаште рӱдола да куд районысо общеобразовательный организацийла гыч 15 команде лийын. Участник-влак кум тематический турым эртеныт. Чумыр налмаште нуно 36 йодышлан вашештеныт, тыге марий калыкын кумдан палыме еҥже-влакым, йылмыжым, сылнымутшым, историйжым да йӱлажым палымыштым ончыктеныт. Йодыш-влакым Йылмым, литературым да исорийым научнын шымлыше В.М.Васильев лӱмеш марий инстиутын кугурак научный пашаенже-влак Надежда Федосеева ден Сергей Свечников, тыгак Марий кугыжаныш университетын преподавательже, профессор Галина Шкалина ямдыленыт. Марафонышто нунак эксперт лийыныт да участник-влакын сайын шонен моштымымым палемденыт.
Эн шуко баллым Советский район Ургаш лицейын «Ургаш еш» командыже поген да 1-ше верым сеҥен налын. Кокымшо ден кумшо верыш Морко район Зеленогорский школын «Эрвий» ден Кужэҥер район Руш Шой школын «Одар» командышт лектыныт.
Ушештарен, «Мунло» марафон Марий Эл Тӱвыра, савыктыш да калык-влакын пашашт шотышто министерствын полшымыж дене республикынан Марий тӱвыра рӱдерже 2014 ий гыч эртара.
Республикысе марий тӱвыра рӱдерын общественность дене кылым ыштыме шотышто пӧлкам вуйлатыше Р.Николаеван материалже негызеш Г.Кожевникова ямдылен
Р.Николаеван фотожо
