– «Девчата» фильмысе повар ӱдыр семын мыят пареҥге дене тӱрлӧ кочкышым ямдылаш йӧратем, – манеш Киров область Яраҥ кундемыште шочын-кушшо, кызыт Йошкар-Олаште илыше Татьяна Ермохина. – Ешна кугу, сандене пареҥгым шыжымак идалык мучкылан ситышым налына. Теният Васильев уремысе изи пазар гыч куд мешакым кондышна да пӧртйымаке вераҥдышна. Иктаж кок кече гыч пӧртыштӧ терысла нелын ӱпшаш тӱҥале. Ончыч канализаций пуч шӱтлен манын шонышна, но амал тӱжвач ончалмаште моткоч йытыра да яндар пареҥге дене кылдалтын улмаш. Тергыме шот дене икмыняр вожсаскам «мундирыште» шолтышым. А эрыктымеке, шӱм йымалне шемалге тӱсан, вӱдан да тамдыме массым ужым – тыгайжым сӧсналан веле пукшаш!..
Тыгай шучко историйым колын, «Россельхозцентр» ФГБУ-н Марий Элысе филиалышкыже йыҥгыртышым да можым-кузежым радамлын каласкалышым.
– Тыгай сынан случай республикыштына шуэн палдырна. Тиде пареҥге йыраҥым свежа терыс дене ӱяҥдыме улмаш. А виян ӱпш сӧсна терысым кучылтмо нерген ойла. Южо пакчазе тиде йӧн дене пайдалана, но агрономический чыла правил почеш пареҥге пакчаш теле гоч шӱйын шинчыше терысым ешарыман. Сӧсна терысым кок ий шӱйыктарыман. Коеш, азапыш логалше Татьяна шагал опытан але чылт опытдымо пакчазын пареҥгыжым налын, – йодышем рашемдыш кушкылым аралыме пӧлкан начальникше Т. Домрачева.
«Россельхозцентр» тӧнежын специалистшылан родо-тукым, йолташ, палыме-влак деч колмо йодышымат пуышым: тений пареҥге лектыш куандарышыжак огыл, сандене тудым эсогыл ялысе-шамычлан кевытыште ма пазарыште але тыглай пакчазе деч оксала налаш перна. Шуко еҥын палемдымыж почеш, тенийсе пареҥге, поснак Курыкмарий район гыч кондымо, тамле огыл. Молан?
– Ты шотышто утыжым ӧршашат, мужедшашат уке, вет кодшо кеҥеж йӱран да юалге ыле. Пареҥгылан вӱд утыждене лийын, шокшо ситен огыл, сандене тыгай таман шочын, – мане Таисия Александровна. – Курыкмарий районысо фермер-влак утларакше Голландийыште лукмо йошкар сорт пареҥгым ончен куштат. Меат, мутлан, шке пакчашкына Гала, Королева Анна гай сорт-влакым шындена. Игече келшыдыме ыле гынат, Голландийыште лукмо сорт вожсаска сайын шочо, но тамже ондаксе Скарб, Лосиноостровский, Петербургский гай сорт деч ударак. Мом ыштет, тиде – голландский сортын ойыртемже.
Татьяна Ермохинам чаманышым, вет куд мешак пареҥгым але ныл тӱжем теҥгем пуйто вӱдыш кудалтен. Ӱдырамашын гай азапыш логалаш огыл манын, пареҥгым кузе чын ойырен налман?
Кумданрак — «Марий Эл» газетын
2017 ий 25 ноябрьыште лекше номерыштыже лудын кертыда
М.ИВАНОВА.
