Марий Эл Республикын Пожар службыжо Параньга районысо муниципальный образований ден ял шотан илемлам вуйлатыше-влаклан Мераҥсола ялыште тул лӱдыкшыдымылык шотышто занятийым эртарен.
Тыште администрацийым вуйлатыше-влаклан кажне илемыште тул пижмым шижтарыше чаҥым шогалташ, кажне оралте воктеке вӱдан йоҥгытым шындаш, ял деч 200 метр коклаште вӱдым налме йӧнан верым келыштараш, чодыра пеленсе ял йыр куралаш, огнетушитель, шугыньо, пагор, ведра, асбест полотно, йӱлыдымӧ покрывал, кольмо, ошман яшлык дене шыҥдарыме пожар щитым вераҥдаш темлыме. –
Илыме верлаште пожар команде ден дружине-влак лийыт гын, эшеат сай ыле, – ушештарен Пожар службын кугыжаныш виктемжын вӱдышӧ специалистше Т.Самигуллина.
Занятий жапыште огнеборец-доброволец-влак тулым технике, мотопомпо полшымо дене йӧртымӧ йӧным ончыктеныт.
М.ИВАНОВА
