Коронавирус чер эпидемийлан кӧра тений Кугу Отечественный сарыште сеҥымылан 75 ий теммылан пӧлеклалтше военный парад Йошкар-Олаште ок лий. Россий Президентын ойлымыж почеш, еҥ-влакын илышышт да тазалыкышт – эн тӱҥ. Сандене чыла пайрем мероприятийым вес пагытлан кусареныт.
Туге гынат, самиозоляций режимым шотыш налын, тиде кугу датылан пӧлеклалтше виртуальный мероприятийже шагалжак огыл эрта, республик мучко тыгайже икмыняре лиеш. Уло Российым авалтыше «Курымашлык полк» акций ойнлайн режимыште эрта. Тудо 11 шагат кечывалым тӱҥалеш. Ушнаш шонышо-влак https://www.polkrf.ru сайтыш ончылгоч лектын кертыт.
«Георгиевский тасма» акций амал дене Сеҥымашын символжым тений уремыште волонтёр-влак огыт пуэде. Тудым кевытлаште, аптекылаште, заправкылаште налаш лиеш, Марий Элыште — 12 адрес дене. Рашрак волонтёрыпобеды.рф сайт гоч рашемдыман.
«Сеҥымаш окна» всероссийский акцият вийым налшаш. Тудым темлыше-влакын шонымышт почеш, 9 майыште Давид Тухмановын «День Победы» мурыжым окна, балкон гыч кажныже 12 шагат кечывалым эсогыл шке шочмо йылмыж денат мурен кертеш. А тидым ыштыме видеом варажым #окнопобеды хештег дене интернетыш вераҥдаш лиеш. Ты акцийыш Марий Элысе район-влакат ушнат.
МЭТР телеканал да Э.Сапаев лӱмеш марий кугыжаныш опер да балет академический театр ты кугу лӱмгечылан «Мы память пронесли через года….»
посна программым ямдыленыт. 9 майыште 13 шагат гыч 16 шагат марте тудын вияш эфиржым metr12.ru, operaballet.net сайтлаште, а телеверсийжым МЭТР ден ОТР каналлаште 17 гыч 19 шагат гутлаште ончаш лиеш.
С.НОСОВА
