Ондалалтше дольщик-влак нерген йодыш республикын правительствыштыже икымше гана огыл тарваталтеш. 2018 ий кеҥежым Марий Элым вуйлатыше тиде йодышым шымлен лекташ да, оксаштым ондалчык чоҥышо-влаклан пуымеке, илыме вер деч посна кодшо еҥ-влакын проблемыштым тӧрлаш кӱштен ыле. Тыгай экшыкым тӧрлымашке кучемын ушнымыж деч вара чыгынен шогалше объект-влакым умбакыже чоҥымо паша верже гыч тарванен.
Чоҥымо паша кузерак шукталтмым, ондалалтше еҥ-влаклан оксаштым пӧртылтымӧ паша кузерак каен шогымым рашемдаш манын, Александр Евстифеев строительстве, архитектур да жилищно-коммунальный озанлык министр Михаил Леонтьев, правительстве председательын алмаштышыже Илга Дравниеце да «Казанский посад» компанийым вуйлатыше Руслан Муталиев дене вашлийын мутланен.
Марий Эл Минстройын увертарымыж почеш, дольщик-влакын праваштым тӧрлен шогышо закон дене келшышын, Йошкар-Олаште мланде участке-влакым ойырымо шумлык конкурсный процедурым эртарыме. Кум проблемный пӧртым чоҥаш тӱҥалме, тышеч иктыжым тений талук мучаште чоҥен шукташ палемдалтеш. Подрядный организаций тудым графикым ончылтен чоҥен шукта, очыни. Министр Михаил Леонтьев чыла паша пеҥгыдемдыме дорожный карт дене келшышын шукталтеш, тачысе кечылан почеш кодмаш уке манын ӱшандарен каласен.
Александр Евстифеев дольщик-влакым паша кузе кайымым кузерак палдарен шогеда манын, Илга Дравниеце деч йодын. Тудыжо тыгерак вашештен: паша кузе каен шогымо нерген увер СМИ-лаште ик гана веле огыл вераҥдалтын, ончыкыжат лийше вашталтыш дене калыкым палдарен шогаш тӱҥалына.
Александр Евстифеев чыла пашам палемдыме жапыште шукташ кӱлмӧ шотышто йодышым «Казанский посад» подрядный организацийым вуйлатышыланат пуэн.
Семёновко посёлкышто нєлтен шуктыдымо пєртын кокымшо пачашыштыже чоҥымо паша шукталтеш. Тушто кажне кечын 30-35 пашазе тырша, увертарен «Казанский посад» компанийым вуйлатыше. Тӱлымӧ оксаштым пєртылташ палемдыме дольщик-влаклан окса тылзе еда тӱлалтеш, пєртылтышаш 40 миллион теҥге гыч 7 миллионжым уже тӱлен шуктымо, каласен Руслан Муталиев.
Ушештарена: «Тугай граждан-влакын, могайыштын оксаштым Марий Эл Республикын территорийыштыже шуко пачеран пӧрт-влакым чоҥымашке ушымо да могайыштын праваштым пудыртымо гын, нунын праваштым аралыме нерген» закон дене келшышын, республикыште азапыш логалше, ондалалтше дольщик-влакын реестрыштым ыштыме. Тушко 116 еҥ пурен. Лийше экшыкым кораҥдышашлан конкурсын результатше почеш «Казанский посад» подрядный организацийым ойырен налме. Тудыжо «пондашан» объектлаште пашам тӱҥалаш да нуным чоҥен шукташ сӧрен.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен.
