УВЕР ЙОГЫН

Пакчасаска арам лийын

Кодшо кечылаште Медведево районышто племзаводын фермыштыже пожар лийын гын, 17 октябрьыште Курыкмарий районысо Актусола ялыште ик ешын пакчасаскам аралыме хранилищыже йӱлаш тӱҥалын. 

Оралтыште вентиляцийым вераҥдыме кумдык гыч шикш лекмым оза 12 шагат гутлаште ужын да тунамак пожарный-влаклан йыҥгыртен. Тылеч вара пелашыже да чӱчӱж дене пырля пожар ваштареш шке вийышт дене кучедалаш тӱҥалыныт. Пожарный-влакын толын шумешкышт тулым чактарен шуктен огытыл, да тудо 300 квадрат метр кумдыкым авалтен гынат, кеч омса ден вентиляций люкым петырен кертыныт. Тыге юж пурымо корным петыреныт да пожар мыняр-гынат эркышнен. Туге гынат тул оралте кӧргым локтылын да ятыр пакчасаскам пытарен.

Специалист-влакын шонымышт почеш, пожар электровоштырышто кӱчык замыканий лиймылан кӧра тӱҥал кертын.

Л.Камалетдинова.

 

Опубликовать в Одноклассники

Добавить комментарий