УВЕР ЙОГЫН

Пайрем концерт гыч — пӧлек дене

29 сентябрьыште Я.Эшпай лӱмеш Марий кугыжаныш филармоний чапле кугу концерт дене «Марий шыже» фестивальжым почо.

Тудо тений 80 ияш лӱмгечыжлан пӧлеклалтын.

Саламлыме шомак дене он ончычак сценыш филармоний вуйлатыше Эрик Юзыкайн лекте да лӱмгече дене ты культур учрежденийыште пашам ыштыше да марий кундемыштына илыше калыкым саламлыш.

Тиддеч вара мутым Марий Эл Правительстве председательын икымше алмаштышыже  Михаил Васютин нале. Михаил Зиновьевич филармонийын 80 ияш лӱмгечыж дене уло марий калыкым саламлыш да республикыштына профессионал хор, семӱзгар, музык, куштымаш сымыктышлан тӱҥалтышым ыштыше-влакым: Яков Эшпайым, Иван Ключников-Палантайым, Алексей Искандаровым, Павел Тойдемарым, Иван Виногоровым да молымат поро мут дене шарналтыш, ыштен кодымо кугу пашашт дене палдарыш.

Чапле лӱмгече дене филармоний коллективым саламлен, Марий Эл Республик вуйлатыше Александр Евстифееват серышым колтен. Тудын дене М.Васютин палдарыш да тыршен пашам ыштыше икмыняр еҥлан наградым кучыктыш. «Марий Эл Республикын калык артистше» лӱм дене Маргосфилармонийын солистше Светлана Осипова, а «Марий Эл» кугыжаныш куштышо ансамбльын   солистше Андрей Иванов «Марий Элын сулло артистше» лӱм дене палемдалтыч.   

— 1 октябрь – Россий музык кече. Тидын вашеш эртаралтше пайрем концертым кугу событийлан шотлаш лиеш. Филармоний профессионал искусствым вияҥдымаште кугу пашам шукта. Тудын ончыкылыкшо моткоч волгыдо, — палдарыш тӱвыра, печать да калык-влакын пашашт шотышто министр Константин Иванов. — Мутлан, «Марий кундем» семӱзгар оркестр декабрьыште Москошто мастарлыкым ончыкташ тӱҥалеш. Тыгак «Марий Эл» ансамбль Кремль полатыште эртыше «Танцуй и пой, моя Россия!» фестивальыш ушна. Элнан тӱрлӧ кундемже гыч чумыргышо коллектив-влак коклаште ты ансамбль марий койыш дене палдара.

Культур министрын ойлымыж почеш, республикнан лӱмжым нумалше ансамбль Германийысе икмыняр олаштат мастарлыкым ончыкта.

— Изи Какшан эҥер серыште Я.Эшпай лӱмеш Марий кугыжаныш филармонийын у полатшым чоҥымо паша мучашлалтеш гын, коллектив-влаклан ямдылалташышт эшеат сай йӧн лиеш,   — палемдыш Константин Анатольевич да ончыкшымат у проект-влак дене ончышо-влакым куандараш тыланыш.

Филармонийын  80 ияш лӱмгечыжлан пӧлеклалтше пайремыште «Марий Эл» куштышо, калык мурым йоҥгалтарыше «Эрэҥер» ансамбль-влак, «Марий кундем» семӱзгар оркестр, А.Искандаров лӱмеш капелле мастарлыкым ончыктышт.

«Марий Эл» ансамбльын «Эҥер воктен, Юл воктен», «Чоя Миклай», «На горе дубок» да моло куштымашыже-влакымат калык шокшын вашлие. Зал гыч «Браво!» йӱк нунын мастарлыкыштлан эн кугу ак семын ятыр гана йоҥгалте.

«Марий кундем» оркестр тӱрлӧ семӱзгарым шоктымыж, а капеллын артистше-влак икмыняр йӱк дене мурым йоҥгалтарымышт дене кумылым нӧлтышт.  

Молгунамсе семынак филармонийын солистше Марий Элын калык артистше-влак Зоя Берникова ден Светлана Осиповам, Олык Ипай лӱмеш Кугыжаныш премийын лауреатше Александр Речкиным залыште шинчыше-влак шокшо кидсовыш дене вашлийыч.

Пайрем концерт поро шӱлыш дене эртыш. Мучашлан филармонийын коллективше ончаш толшо икмыняр еҥлан вес мероприятийыш толаш абонементым кучыктыш.

— Артист-влак моткоч мастар улыт, а тидлан шагал огыл ямдылалташышт кӱлын, очыни. А пӧлекым модын налмылан ӱшанымылат ок чуч, — куанжым пайлыш абоненментым модын налше Елена Оленева.

Алевтина Байкова.

М.Скобелевын фотожо.

Опубликовать в Одноклассники

Добавить комментарий