Энергетике

Пайдалын да оҥайын

«Рӱдӧ да Юл кундем Россеть Мариэнерго» филиалын первичный профсоюз организацийже, кодшо ийысе пашам иктешлыме почеш, социальный партнёр кылым шуйымо, пашаеҥ-влакын права ден тазалыкыштым аралыме, тӱвыра ден канышыштым пойдарыме, профсоюз член-влаклан ковид условийыште пашам ойырлен ышташышт да илашышт йӧнештарыме шотышто кугу сомылым шуктен.

Кодшо ийысе эн кугу да кӱлешан событий семын Кугу Отечественный сарыште сеҥымылан 75 ий да ГОЭЛРО планым илышыш пурташ тӱҥалмылан 100 ий теммым ончыкташ лиеш.

Ветеран совет да филиал вуйлатыше-влак дене пырля профком отрасльын ветеранже-влак дене вашлиймашым эртарен, лӱмгечыла дене саламлен. Кугу Сеҥымаш вашеш пашам ыштыдыме пенсионер – тылыште тыршыше да сар жапысе шочшо-влак кочкыш продукт вӱдылтышым да шергакан пӧлекым налыныт.

Йоча-влаклан посна тӱткыш ойыралтын: профсоюз организаций пашаеҥ-влакын шуко икшыван ешыштлан, икымше классыш кайыше але 9-ше ден 11-ше класслам тунем пытарыше-влаклан полшен, олимпиадылам эртарымашке ушнен, Энергетикын кечыж вашеш йоча сӱрет конкурсым иктешлен да сеҥышылан приз ден пӧлекым кучыктен.

Профсоюзын тыршымыж денак коллективыште физкультурым да таза илыш-йӱлам вияҥдыме шотышто кугу сомыл ышталтын. Филиалын пашаеҥже-влак идалык мучко Йошкар-Оласе, Козьмодемьянскысе да Шернур посёлкысо Ий полат ден бассейнлашке коштын кертыныт.

Профсоюз член-влак корпоратив конкурс ден интернет-акцийлашке, оффлайн ден онлайн-таҥасымашлашке чолган ушненыт. Пейнтбол дене, ий йымалсе колым кучен ӱчашеныт. Волейбол команде-влак «Динамо» клубын площадкылаштыже шке мастарлыкыштым куштеныт. Энергетикын кечыж вашеш онлайн-площадкыште шахмат дене турнир лийын. Самырык-влак совет дене пырля уш-акыл модмашлам эртарыме.

Филиалысе профсоюз организацийын председательже Ольга Колтыгина ден профком пашаче ешын илышыжым пайдалым да оҥайым ыштат. Компанийын паша ден мер илышыжым пойдарат.

Ю.ИСАКОВ

Опубликовать в Одноклассники

Добавить комментарий