Январь тӱҥалтыште Изи Какшан набережныйыште шкешотан У ий пайрем вашлиймаш эртен. Тушко, калык йӱлам шотыш налын, спорт дене кылым кучышо-влак чумыргеныт. Такшым тыгай пайремлан тӱҥалтышым идалык ончыч чолга еҥ, спортсмен, физкультурник-шамыч ыштеныт.
Мероприятийын шонымашыже – пайремым кочывӱд деч посна эртараш. Тидлан Марий епархий ден Минспорттуризм полшеныт. Ты кечын толшо-влак оҥай викториныште вуйыштым пудыратылыныт. Мутлан, икымше январь Российыште Илья Муромецым шарныме кече нерген шукышт пален огытыл. Пайремыште онарын кердыж дене войзалташ йӧн лийын. Кумылан-шамыч тыгак бокс школын келыштарыме рингыштыже вий-куатыштым терген кертыныт, кирам, штангым нєлтеныт, канатым шупшмаште таҥасеныт.
Мероприятийын эше ик ойыртемже – лотерей модылтмаш. Туштыжо спорт пєлек-влак лийыныт. Пайремыш толшо-шамыч, шокшо тутло шудо чайым подылын, кылмыме нергенат монденыт.
Е.ЭШКИНИНА
