COVID-19

Сайжымат, удажымат врач рашемда

Элышкына у коронавирус инфекцийын кудымшо толкынжо лишемме нерген ойлат. Тидымак шотыш налын, Россий Федерацийынат, Марий Элынат Тазалык аралтыш министерствышт калыкым тиде шучко чер дене нелын черланыме деч прививкым ыштыкташ да ревакцинироватлалташ ÿжыт, молан манаш гын тÿшка иммунитет шошо тÿҥалтышсе жап деч палынак лушкен.

Шукерте огыл Марий Элыш у коронавирус инфекций дене черланыме деч 358 упаковко «Эвушелд» препаратым кондымо. Тудым Россий Федераций кумдыкышто COVID-19 дене инфицироватлалтме деч тений январь гыч кучылташ темлыме.

– «Эвушелд» препарат у коронавирус инфекций дене черланыше-шамыч коклаш логалме деч ончыч кучылталтеш, – каласкала регионын тазалык аралтыш министржын алмаштышыже Юлиана Зейтулаева (снимкыште). – Препарат COVID-19 дене черланыдыме, тыгак инфицироватлалтше еҥ дене кылым кучыдымо 12 ияш деч кугурак ийготан пациент-шамычлан палемдалтын. Рашемденрак каласаш гын, тиде средстве дене огыт эмлалт, а черланыме деч аралалтыт. «Эвушелдым» инфекциян огыл неле хронический чер дене орланымылан кöра пациентлан у коронавирус инфекций деч аралыше моло вакцине дене прививкым ыштыкташ чарыме годым кучылташ лиеш.

Препарат чыла еҥлан келшен огеш тол. Тудын айдеме организмлан пайдале улмыжым але удам ыштен кертмыжым аклышашлан пациент-шамычлан участковый терапевт але черым эмлыше профильный врач деке каяш кÿлеш. Препаратын, организмлан зияным ыштыде, у коронавирус инфекций деч арален кертмыжым рашемдымеке, врач пациентлан направленийым пуа – «Эвушелдым» кечывалым але сутка мучко пашам ыштыше стационарлаште веле шындат, молан манаш гын процедур деч вара айдемын шкем кузе шижмыжым медицине велым эскераш кÿлеш.

М.ИВАНОВА

Фотом Марий Элын Тазалык аралтыш министерствыжын сайтше гыч налме

Опубликовать в Одноклассники

Добавить комментарий