ТАЗАЛЫК

Ош халатым чиет гын…

Волжский районысо Памар врач амбулаторийыште педиатр Е.Пономарёва ден медсестра И.Кольцова (снимкыште) ик кабинетыште вашла умылен да полшен пашам ыштымышт деч посна эше шочмо кечыштымат ик кечыштак, 4 июньышто, палемдат. Тений Елена Викторовналан 34 ий темын гын, Ираида Гурьяновна 55 ияш лӱмгечым палемден, сандене мутна юбиляр нерген лиеш.
Пӧтъялыште шочын-кушшо ӱдыр кандаш класс деч вара Йошкар-Оласе медучилищыш тунемаш пурен.
– Акам пеш черле ыле. Авам тудым эре больнице еда коштыктен: я Волжскышко, я Йошкар-Олашке… Вара инвалид лие… Лач тунам ешыште кеч ик медик лийшаш манын шонен пыштенам, – профессийым ойырен налме амалже дене палдарыш лӱмгече оза.
Медучилищым 1983 ийыште йоча профилактический медицине тӧнежын медсестраже специальность дене тунем пытарен да Волжск оласе рӱдӧ больницын азам ыштыме отделенийыштыже пашам ышташ тӱҥалын. Ныл ий гыч Памар врач амбулаторийыш куснен.
– Паша шуко, ответственность кугу, рушарня деч моло кажне кечын автобус дене тышке-тушко кудалышташ логалеш гынат, медикын профессийжым ойырен налмемлан ик ганат ӧкынен омыл, – каласкала Ираида Гурьяновна. – Мый вет профессием веле огыл, тыгак Памар, Упшер, Кичиер, Ваштар курык, Пӧртанур да Шеренкуп кундемлаште илыше 930 йочанамат моткочак йӧратем. У коронавирус инфекций шарлымылан кӧра посна улмо режимым ыштымеке, шукыштым кок-кум тылзе ужын омыл. Ынде пашана эркын дене шке йогынышкыжо пура, да икшыве-шамычым прививкыш мойн ӱжыктена, верлашкат лектын коштына. Кок-кум тылзе – шукат огыл, но южо ньогаже тиде жапыште тынаре кушкын, тынаре вашталтын! Кажныжым кидыш налын модыктымо, йӧратыме шуэш – тынаре йокрокланенам улмаш. Тымарте участкыштына у коронавирус инфекций дене ик йочат черланен огыл, да Юмо аралыже тыгай азап деч. Роспотребнадзорын чыла темлымашыжым кӱлын шуктена гын, черым лишыл жапыште сеҥена, да илышна шке радамышкыже пӧртылеш, шонем.
Ош халатым чиет гын, шкендын лиймым чарнет, маныт. Тидыже Ираида Гурьяновна денат моткоч чак кылдалтын. Кок ӱдыр йочан тулык вате уло илышыжым медицине пашалан пӧлеклен. Телефон номержат пуйто паша телефоныш савырнен: йоча черлана гын, вигак тудын деке йыҥгыртат, да медик, жапым шуйкалыде, изи пациентше деке мия.
– Ираида Гурьяновнан кидше гоч икмыняр тукым эртен, сандене тудо кундемысе шуко еҥым шочмыж годсек пала. Нунын коклаште мыят улам, – каласкала Денис Смирнов. – Жапше годым Приволжский посёлкышто ик тӱшкагудышто иленна, кызытат келшена: пареҥгым пырля шындена-луктына, монча выньыкым ямдылена, пайремым палемдена… Мо шарнем, тудо шкеж нерген тынаре огеш азаплане, мыняре калык верч тургыжлана, чылалан полша. Эре – пашаште, эре – калык коклаште, эре – корнышто… Медицине документацийым шуэн огыл мӧҥгышкыжат конда, тӱрлӧ отчётшо дене мойн йӱд марте шинча, а эрдене адакат остановкыш вашка. Тыге – 33 ий. Пеш ондак пелаш деч посна кодо, кок ӱдыржым шкетынак йол ӱмбаке шогалтыш. Шуко неле-йӧсым ужашыже да чытен лекташыже логале. Но поро, тыматле да кожмак койышыжым ыш йомдаре, мӧҥгешла, вияҥдыш гына. Ик ӱдыржӧ аваж семынак медицине корным ойырен нале. Кызыт Ираида Гурьяновнам шочшыжо-влак веле огыл, тыгак кум эрге да ик ӱдыр уныкаже-шамыч куандарат.
И.Кольцован район кӱкшытан Чап кагазше-влак улыт, но лӱмгечыжлан эше Марий Элын тазалыкым аралыме министрже М.Панькован Таумутшым кучыктеныт.

Маргарита ИВАНОВА

Опубликовать в Одноклассники

Добавить комментарий