3 октябрьыште Йошкар-Олаште марий калыкын материальный огыл культур поянлыкшым аралыме да вияҥдыме «Ош кече» фондын презентацийже эртен.
Марий Элын Т.Евсеев лӱмеш национальный тоштерышкыже погынышо-влак кокла гыч кажныже шочмо йылмынам, йӱланам, юмыйӱланам, тӱвыра поянлыкнам арален кодаш кӱлмӧ йодышым сайын умыла. А шукышт тидым илыш мучкылан налме тӱҥ пашашкышт савыреныт.
Тыгай шотан фондым ышташ кӱлешак манын, ик гана огыл кугу трибуно гыч темлымаш йоҥген, Марий калыкын луымшо погынжын пунчалышкыжат пуртымо. Теве ынде «Ош кече» лектын.
Агробизнес кадрым уэш ямдылыше марий институтышто икымше гана марий юмыйӱла курсын тунемше-влак дене мутланымаште краевед да мер пашаеҥ И.Степанова ты шонымашым кумданрак ончалаш темлен. Фондым закон дене келшышын ышташ, кӱлеш документым погаш, регистрироватлаш тарванышыже шке коклаштак лектын. Тиде – Виталий Головин. Тудак фондын президентше. Пеш кӱчык жапыште документым ямдылыме, регистрацийым эртыме. Тиде жапыштак паша радамым ыштыме да проект-влакым могай организаций-влак дене пырля шуктышашым рашемдыме. Мутлан, лишыл жапыште национальный тоштер дене пырля «Мый марла ойлем» школым почыт. Марий йылмым тунемаш шонышо да тудым келгынрак пален налаш кумылан-влаклан посна группо-влак лийыт. МарНИИЯЛИ дене пырля ыштышаш паша тыгак кумда: научный комментариян «Марий кумалтыш мут» книгам, мӧҥгыштӧ пелешташ туныктышо аудиокнигам, марий йӱла да пайрем дене кылдалтше энциклопедийым ямдылаш… Кӱсото ден марий тӱрым, марий чон поянлыкым арален кодымо шотыштат шагал огыл ыштыман.
«Ош кече» фондын презентацийжым филологий науко доктор, фондын попечительский советшын (чылаже луын улыт) еҥже Любовь Абукаева вӱден. Палемдыме темын кӱлешлыкым тӱрлӧ шӧрын гыч ончен иктешлен. У мер организаций ышталтме дене Марий Элын культур, савыктыш да калык паша шотышто министрын алмаштышыже Галина Ширяева, Кугыжаныш Погын депутат-влак Лариса Яковлева ден Наталья Пушкина, МарНИИЯЛИ директорын алмаштышыже Людмила Григорьева, Оньыжа Эдуард Александров, Шочмо йылме туныктышо-влак ассоциацийын советшым вуйлатыше Елизавета Игнатьева да тоштер директор Светлана Зверева шокшын саламленыт. Кажныже тиде татым марий калыкын илышыштыже шкешотан тамга семын палемден.
С.Пехметова.
Снимкыште: И.Степанова, В.Головин да Л.Абукаева
М.Скобелевын фотожо.
