12 сентябрьыште Оренбургышто юнармеец-влакын «Юл кундемын зарницыже-2018» военно-патриотический модмашын окружной финалже почылтын. Тушко Марий Элын Марий Турек районысо Нартас кыдалаш школын 14 тунемшыже миеныт.
Чылаже мероприятийыш Юл кундемын икмыняр регионжо гыч 14 команде чумырген. Чылаже 200 ӱдыр-рвезе шке вийжым ончыкта. Тылеч ончыч нуно республикысе, областьысе, крайысе этапыштышт сеҥышыш лектыныт.
Юнармеец-влакым Юл кундем федерал округышто Россий Президентын полномочный представительжын алмаштышыже И.Паньшин, Оренбург областьын губернаторжо Ю.Берг, «Юнармий» толкынын регионысо пӧлкажын штабшым вуйлатыше Н.Мирошниченко да молат саламленыт. Юрий Берг «Зарницын» Оренбург областьысе этапше нунын землякышт, Российын Геройжо А.Прохоренколан пӧлеклалтмыжым палемден. Александр Прохоренко 2016 ийыште мартыште Сирийыште окруженийыш логалын да герой семын колен.
Модмашын пайрем ужашыжым почмаште шукыштлан «Юнармий» толкынын регионысо штабшын еҥже-влаклан Пальмира гыч мланде дене капсулым аралаш кучыктымо шарнашеш кодын. Тиде пайремле тат Российын Геройжо А.Прохоренком шарнымылан, Сирийыште терроризм ваштареш кучедалше салтак-влаклан пӧлеклалтын.
«Зарница» ныл кече шуйна. Тиде жапыште ӱдыр-рвезе-шамыч моштымашыштым строевой подготовкышто, автоматым рончымаште- погымаште, спорт ориентированийыште, тактический модышышто ончыктат. Тыгак уш-акылыштым военный ден историй викториныште пудыратат. Сеҥыше 15 сентябрьыште пале лиеш. Тудо Юл кундем федерал округын чапшым «Победа» всероссийский военно-патриотический модмаште аралаш тӱҥалеш.
Л.ШАБДАРОВА.
