Александр Евстифеев Марий Эл Республикын мутланымашын патологийже да нейросенсорный ден двигательный экшыкым нейрореабилитаций йӧн дене тӧрлымӧ шотышто рӱдержын тӱҥ врачше Виктор Севастьянов дене вашлийын мутланен.
Ученый, специалист да шуко тӱрлӧ чер деч эмлыше врач семын тендан шонымашда мыланна пеш кӱлешан. Тазалыкым аралыме тачысе пашам, медицинысе тӱҥ фондна-влакым – медицине рӱдер-шамычым, медицине техникым кузерак акледа? Республикысе калыкын тазалыкше могайрак? Нине йодыш шотышто мом каласаш кўлешлан шотледа гын, чыла каласкалыза, мый колышташ ямде улам, палемден республикым вуйлатыше мутланаш тӱҥалме годым.
Профессор, медицине науко доктор Виктор Севастьянов рӱдерже нерген каласкален, тудыжо 1999 ийыште негызлалтын. Мутланымашын патологийже да нейрореабилитаций рӱдер тачысе кечылан элыште икте веле. Тушто чыла тӱрлӧ ийготан еҥ-влакым мутланымаш чот пужлымо, паралич, вуйдорык да тупрӱдӧторык локтылалтме, шинча начарын ужмо деч эмлат. Шукерте огыл учрежденийыште аутизм черан еҥ-влакын психике велым почеш кодын вияҥмыштым эмлыме у йӧным шонен луктыныт. Рӱдерын эмлыме йӧнжӧ-влакым патент дене аралыме.
Чӱчкыдынак йочам психиатрийыш пыштат, шымлат да эргыдам нигунам эмлаш огеш лий манын каласат. А ме тыгай йоча-влакым йол ӱмбак шогалтена, нунылан тичмаш илыш дене илаш йӧным ыштена. Ме ойыртемалтше, авторский йӧн дене эмлена. Ик йоча полицейский лийнеже, весе – президент, нуно тыглай школышто тунемыт, нунын инвалидностьыштым кораҥдат. Опытнам эл мучкат кучылташ лиеш, шонем, каласен Виктор Севастьянов.
Медицинын кызытсе состоянийже нерген ойлымыж годым Рӱдерын тӱҥ врачше техникым уэмдаш кӱлмым палемден. Докторын шонымыж почеш, Республиканский йоча клинический больницылан компьютерный томографым налаш кӱлеш.
Вашлиймаште регион-влакын тӱшка вий дене налме шергакан медицине оборудований дене пайдаланен кертме йӧным рашемдымаш кӱлешан йодышыш савырнен. Александр Евстифеев тыге пашам ышташ лиеш мо манын йодын.
Тиде пеш ушан-шотан ошкыл, но кызыт кажне республик шке ыштен налаш тырша. Мутлан, Чувашийыш шуко пациентым цинкографийыш колтена. Шкенан аппаратна уке. Тудым налына гын, онкологий черан чыла еҥым тыгай шымлымаш дене шке авалтен кертына, ешарен Виктор Севастьянов.
Рӱдерын тӱҥ врачшын шонымыж почеш, ондакысе семын кеч централизоватлыме лабораторий кӱкшытыштє коопераций лийшашак.
Марий Элым вуйлатыше Александр Евстифеев эше ик кӱлешан йодышым – диспансеризаций йодышым тарватен. Профессор Виктор Севастьяновын шонымыж почеш, ялыште черланен кертме лӱдыкшым ончылгоч кораҥдаш куштылго огыл. Врач-влак дек чӱчкыдын логалын кертдымылан кӧра еҥ-влак черланымыштым кокланже огытат пале. Чот черланымекышт веле эмлалташ тӱҥалыт.
Вашлиймаште тыгак эмым ситарыме да медицине кадрым ямдылыме йодышымат каҥашеныт. Марий Элым вуйлатыше пытартышлан фитоэмлалтмаш шотышто кундемын йєнжє нерген йодыштын. Вет Марий Эл экологий велым аклымаште яндар кундемлан шотлалтеш да эмлык шудыжат шуко тӱрлӧ уло.
Марий Эл Республикым вуйлатышын организаций да аналитике виктемжын уверже негызеш П.Шакиров ямдылен
