Ынде Марий Элыште илыше-влакат Москвасе онкорӱдерыште ОМС-ын полисше дене эмлалтын кертыт, увертара Москвасе тӱнямбал онкологический рӱдерын пресс-службыжо.
Москвасе тӱнямбал онкологический рӱдерым (ММОЦ) 63-шо №-ан оласе клинический больнице пелен почмо. Тушто Российын чыла регионжо гыч толшо пациент-влак ОМС-ын полисше дене диагностикым эртен да эмлалтын кертыт.
Рӱдерыште шӧрту, шодо, предстательный ту, авагудо шейке, муныгудо, пагар, пагарйымал ту, кӱжгышоло, коваште рак гай осал пуалшым рашемдат да эмлат.
ММОЦ – шуэн вашлиялтше медицине комплекс. Тушто онкологий полышым тӱнямбал стандартлан келшышын пуашлан 3 ПЭТ/КТ томограф, КТ, МРТ, ОФЭКТ/КТ гай виян оборудований, тичмаш шымлымашым эртараш гистологический лабораторий улыт. Рӱдерын врач-онкологшо-шамыч черым рашемдыме да эмлыме шотышто кугу опытым погеныт. Нуно пациент-влакым тӱнямбалсе пытартыш клинический темлымашым шотыш налын да Россий Федерацийыште пеҥгыдемдыме стандарт дене келшышын эмлат. Тыгодым эм терапийын (химио-, иммуно- да таргетный терапий) у йӧнжӧ-влакым, 3D да 4D гай лучевой терапийым, радиохирургийым кучылтыт, хирургический операцийым ыштат.
Комплексыште пациент-влаклан чыла йӧным ыштыме: регистратурышто — чурийвылышым пален налше технологий (Face ID), клиникыште — ик веран палате да электрон навигаций системе. Тыгак, черетым вучаш огыл манын, https://oncomos.ru/ сайт полшымо дене врачын приёмышкыжо онлайн йӧн дене возалташ лиеш.
ММОЦ-ын радиотерапий рӱдержым Российыште эн кугулан шотлалтше кандаш линейный ускоритель дене шыҥдарыме. Тушто лучевой терапий ден радиохирургийын чыла видыштым пытартыш гана ыштен лукмо оборудований полшымо дене эртарат. Мут толмашеш, рӱдерыште радиохирургийлан Varian EDGE комплексым шындыме. Тудо капкылын тӱрлӧ ужашыштыже верланыше чыла осал пуалшым эмлаш да шуко метастазым ик сеансыште облучитлаш полша. Тыгай комплекс Российын ОМС системыштыже икте гына! США-н, Великобританийын, Италийын, Португалийын, Швейцарийын кугу медицине рӱдерлаштышт EDGE ускоритель дене вич ий ончычак пайдаланаш тӱҥалыныт да тудын шуко пациентлан полшымыжым пеҥгыдемденыт.
Онкологий дене черланенам манын шонымо годым, тыгак ешартыш диагностикым эрташ але рак деч эмлалташ кӱлеш гын, Москвасе тӱнямбал онкологический рӱдерын полышыжлан кокытелныде эҥерташ лиеш.
М.ИВАНОВА
