Йошкар-Ола кумдыкышто тӱшкан пайдаланыме общественный верым 2021 ийыште тӱзатышаш верч 14 майыште каҥашымаш тӱҥалын.
Ола администрацийын увертарымыж почеш, «Илыме вер да оласе среда» национальный проект дене келшышын, площадьым, тротуарым, эҥер серым, паркым, скверым да чарак деч посна тӱшкан пайдаланыме моло верым вес ийын тӱзаташ калык деч темлымашым 13 июнь марте ончаш тӱҥалыт.
Ончычсо йӱклымаш семынак, тӱзаташ темлыме кумдыкым палемден, серышым электрон адрес (blagoustr_gorod@i-ola.ru.) але почто дене ола администрацийыш колтыман. Йӱклымашке ушнышо кажне еҥ шке фамилийжым, лӱмжым, ача лӱмжым, илыме вержым ончыктышаш. Йӱлымашке ынде олаште илыше 100 деч шагал огыл еҥ ушныман проект гына лукталтыт.
Р.ЧЕПАКОВА
