Шукерте огыл Крымыште «Таврида-Арт» фестиваль эртен. Марий Эл гыч тушко латик самырык еҥ миен толын. Нунын кокла гыч иктыже – Юл кундем технологий университетын студентше Ильнур Савин.
«Таврида-Арт» – мыйын илышыштем ик эн кугу мероприятий. Тушко ушнаш манын, идалык мучко ыштыме пашам ончыктышо резюмем ямдыленам. Тыгак икмыняр йодышлан вашештыше видеом войзенам.
Фестиваль пеш тӱвыргӧ ыле. Тушто лекций, мастер класс-влак лийыныт, чылаже кум шӱдӧ наре мероприятий. Кажне участник шкалан кӱлеш аланым муын да тушто шке шинчымашыжым нӧлтен кертын. Тыгак мемнан деке вашлиймашыш шагал огыл кумдан палыме спикер ден артист-влак толыныт.
«Тавридыште» келшымаш шӱлыш озаланен. Тидыже шарнымашеш поснак кодын. Тушто налме шинчымашым ончыкылык пашаштем кучылташ тӱҥалам,» – палемдыш Волжск олаште шочын-кушшо рвезе.
О.МОШКИНА
