САМЫРЫК ТУКЫМ

Эрыкан пашазе

Тыге кусаралтеш англичан йылме гыч фрилансер мут. Нуно интернет гоч пашам ыштат. Кечыштым кӱлеш семын келыштарен кертыт, шканышт шке вуйлатыше улыт, кӧ дене кылым ышташ шке ойырат. Пайдаже шуко. Тиде сомылышто чолга да лӱддымӧ лийман. Лач тыгай улеш тачысе лаштыкын унаже, графике дизайнер – Ирина Ильина.

 Ӱдыр Марий Турек посёлкышто шочын, йочаж годым ешыж дене Йошкар-Олаш илаш кусненыт. Тыге гынат шуко жапым шочмо кундемыштыже эртарен. Тыгак Кужэҥер район Пӱнчерйымал ялыш коча-коваж-деке чӱчкыдын уналыкеш кудалыштын. Тыге пӱртӱсым йӧратен, ял илышым аклен кушкын. Кӱшыл шинчымашым Марий Кугыжаныш университетыште налын, калыкле кокласе кылым шымлен.

– Фрилансер марте шкендым ятыр вере терген онченат. Ты корнет дене палдаре.

Чынжымак, кушто гына пашам ыштен ончен омыл. Теве нылымше курсышто тунеммем годым «Work and Travel» программе почеш Америкыш миен коштынам. Тушто шере кочкышым ужалымаште тыршенам. Тидыже оксам ыштен налаш веле огыл, вес элыште илен ончаш, англичан йылмым палымем вияҥдаш йӧным ыштен.

Тунем пытарымеке, ик страховой компанийыште маркетологлан ыштенам. Но ты паша писын келшымым чарнен. Лач рекламе макет-влакым ямдылыме веле куандарен. Сӱретлаш йӧратымем верч, очыни. Тушеч декрет отпускыш каенам. Йоча дене шинчыме пагытыште веб-дизайнер, фотошоп, тӱрлӧ графический редакторлам кучылташ туныктышо курслам эртенам.

Тошто верыш пӧртылмӧ йӧршын шуын огыл. Тыге «iSpring» тӱнямбал компанийышке логалынам. Тушто паша неле гынат, келшен. Но кандаш ийым офисыште шинчен эртарымеке, карьер тошкалтыш дене кӱзаш, вияҥаш лийдымылыкым шижынам. Тыге ик эрдене паша деч кораҥаш шонен пыштенам. Тыгак лийын.

Умбакыжым Россий блогер-влак дене кылым кучаш тӱҥалынам. Нунылан презентацийым ышташ, сайтым вӱдаш, контентым чоҥаш полшенам.

– Блогер-влакше дене вашкылым кузе муынат?

– Ончыч йолташем радамыште улшо-влакын блогыштым эскеренам. Йодмашышт лийын гын, шке полышем темленам.  Вара Instagram-ыште лӱмынак лаштыкым ыштенам. Тушко блогер-влак шке возат. Но тиде паша кунам уло, кунам уке.

Тугеже пашадар шотыштат нелылык вашлиялт кертын?

Тыге. Мыйын пелашем – ӱшанле эҥертыш. Садлан у деч ом лӱд, очыни. Туге гынат интернетыште улшо вакансий-влакым эскеренак шогенам. Ик гана шинчамлан «Upwork» биржын уверже пернен. Ончыч предприятий ныл тылзаш курсым туныктен луктын, вара пашам темлен. Тыге Южно-Африканскай Республик, Австралий, Германий гыч компанийла дене келшаш тӱҥалынам.  Ончыч фиксированный оплате ыле, кызыт почасовой.

– Тиде тӱлымӧ йӧн-влак мо дене ойыртемалтыт?

Йодшо ямде сатулан веле тӱла гын – тиде фиксированный. А кунам тыршыме кажне шагатетым аклалтеш – почасовой.

Кокымшыжлан компьютерышке лӱмын келыштарыме программе шындалтеш. Тудыжо кажне лу минут гыч экраныште скриншотым ышта. Тыгак мышке тарванымым, компьютерысе кажне ошкылым эскера. Мыйын шонымаште интернет пашаште тиде йӧн эн чын.

Палем, тылат, дизайнер семын, марий тамга денат пашам ышташ логалын.

Тыгай йодмашым икымше гана вашлийнам. Ончыч нелын чучын. Тамга-влак модыш пурат гынат, пеш эркын. Садлан пример шотеш ончалаш нигушто. Адакшым  йошкар, ужар, канде тӱс-влак кызыт трендыште ончыл верым огыт нал. Тидыжат чаракла чучын.

Тӱҥлан кече тамгам налынам. Тудым тӱрлӧ могырыш пӱтыркален, иземден-кугемден, тӱсым вашталтен онченам. Дизайнерын сомылжо тыгай – уым, моло деч ойыртемалтшым ышташ. Тыге кызытсе жаплан келшыше этно узор «шочын».

Ончыкыжымат, историйым шымлен, шке пашаштем тамгам кучылташ кумылаҥынам. Тыге тудым самырык коклаште шараш, палымым ышташ лиеш.

– Тыгак тый путешествийым йӧратет. Тидыже социал лаштыклат гоч падлдырна.

– Вес кундемлаш лектын коштмо, пӱртӱс памятник деке миен толмо, тоштерлаште жапым эртарыме мыланем вийым пуа, пашамланат пеш пайдале.

Кок ий ончыч ешем дене Оршанке район Ивановка ялыш илаш кусненам. Пандемий жапыште ме йыр улшо мотор верлаш лектын коштынна. Республикымат ончалаш кумыл лектын, да икмыняр вере миен толынна. Марий пӱртӱснаже могай мотор мотор улмаш! Шукынжо тудым ужде илат.

Тыгай годым мыланем видеом войзаш келша. Вӱдын ласкан гына йогымыжо, мардеж пуалмеке, лышташын укш гыч кӱрылтмыжӧ, лывын чоҥештен кайымыже – чыла шарнымашеш кодшо шонем.  Тыге кӱчык роликым ыштен, социал лаштыклашкем вераҥдем. Ончышо-влакым иктаж вере миет толаш кумылаҥдынем.

Вес эллашкат логалаш пиал шыргыжын. Америкыште, Кипрыште, Болгарийыште, Австрийыште лийынам.

– Лийме верлат гыч ик эн сылныжым палемден кертат?

– Шукерте огыл пелашем да эрге-ӱдырем дене Чӱкша курыкыш миен коштна. Тудо республикыштына эн кӱшыл верлан шотлалтеш. Курык вуй гыч пасу, чодыра, ял-влак койыт. Тушто нимучашдыме эрык, пӱртӱсын вийже шижалтеш.

Чумбылат курыкышко миен толмат шарнымашеш кодын.

­– Лудшына-влаклан могай тыланымашет лиеш?

– Кундем мучко кошташ йӧным кычалза. Тораш каен огыда керт гын, велосипедыш шинчын але йолын пӱртӱс лоҥгаш лекса. Вет уым почын, те шкендамат вес могыр гыч ужыда, вияҥыда.

Йӧн шагал, паша уке, окса ок сите манын шортын ида шинче. Илыш – шкендан кидыштыда. Изиш вийым пыштеда гын, чылажат кӱлеш семын лиеш. Вет кызытсе жапыште тынар йӧн пуалтын. Нуным муын, чын кучылт моштыман. 

 – Ончыкылык корнет волгыдо лийже.

– Тау!

О.МОШКИНА

Опубликовать в Одноклассники

Добавить комментарий