Южо рвезын турникыште шкем нӧлтымыжым, пел кид дене тӱрлӧ упражненийым, отжиманийым ыштымыжым, туштак кишкыла пӱтырнылтмыжым ужын, ӧраш гына кодеш. Пытартыш жапыште спортын олимпийский огыл видше дене таҥлалтше-влак палынак ешаралтыныт. Нуно уремысе теҥгылыште, кудывече турникыште шкешотан трюкым ончыктылыт. Калыкат эсогыл шогалынак онча. Рвезе-влак, тидым ужын, тыгай секцийлашке возалташ йодыт, но… Экстремал упражненийлам ыштылаш секцийыште огыт туныкто. Кумылан-влак тыглай площадкыште шуаралтыт. Нуно посна тӱшкам шке чумыреныт. Мутлан, Йошкар-Олаште гын Воркаут площадкыш коштыт.
– Шкем турникыште нӧлташ, пӧрдаш, отжиманийым пел кид дене ышташ мыланна оҥай. Шкем физически шуараш – осал койыш огыл. Тыге кажне еҥ ок мошто, – ойла Воркаут клубын участникше, тусо организатор В.Мосолов.
В.Ленин лӱмеш полат воктене Воркаутлан посна фитнес-площадкым келыштареныт. Икмыняр ий ончыч лӱмеш полатын администрацийже электрон аукционышто участвоватлаш йодмашым пуэн. 31х13 метр кумдыкан площадкыште 15 спорт объектым келыштарышаш улыт улмаш. Нунын коклаште отжиманийым ышташ, шкем нӧлташ кум турникан, мӱшкыр чогашылым пеҥгыдемдаш да моло неле упражненийым ышташ вич турникан каскад-шамыч таче кечылан илышыш шыҥдаралтыныт.
Туштыжо ончылгоч ямдылалтше да кумылан-влакат кап-кылыштым тӱрлӧ семын лывыртен кертыт.
Кеч-могай жапыште
Воркаутым экологически яндар, тазалыклан лӱдыкшыдымӧ да сай качестван материал гыч ыштыме. Таче кечылан тушто тӱрлӧ показательный выступлений эртаралтеш, ты клубын участникше-влак тӱрлӧ мероприятийлашке ушнат, мастер-классым ончыктат, а тренировкым нуно суткан кеч-могай жапыштыже эртарат.
– Ты площадке сутка мучко ок петырналт. Шонышо еҥ пырля ямдылалташ полышым йодынат толын кертеш. Южышт изиш ӧрмалга, сандене пычкемыштат толын каят, капым «тодыштыт». Икте лу литр пивым йӱын кертмыж дене кугешна гын, ме теве кап-кылым шкешотан упражнений дене пеҥгыдемдыме шотышто ойыртемалтына, шонем. Тиде арам ок лий. Мыланем армийыште пеш кӱлеш лийын. Таҥасымашлаштат вийнам тергена. Мемнам ӱжыт. ӧрдыж кундемыште таҥасаш корнылан южгунам спонсорым кычалына, южгунам шке гыч, автостоп денат каена, ача-ават полшат.
Олан кечыжым палемдыме годым кумылан-влаклан изирак таҥасымашым эртарышна. Мо оҥайже: тушко тыглай эртен кайыше, ончен шогышо-влакат кумылын ушненыт. Пӧлек дене спонсор-влак полшеныт. Спорт министерствыланат кугу таум каласена, – ойла В.Мосолов. – Самырык тукымлан таза илыш-йӱлам кучымо шотышто пример семынат улына, шонем. Кӧлан тыгай вид келша, тек мемнан деке толеш. Ме у еҥ-шамычым ужаш куанена веле. Кумылет лиеш гын, йӧн эре лектеш.
Рвезе-влак школлашкат лектыт, тушто мастер-классым ончыктат.
Кап-кылым тыгай йӧн дене шуарыше кокла гыч ӧрыктарыше да неле упражненийым ыштыше семын Дмитрий Адигановым (Советский район гыч), Андрей Кулагиным, Фёдор Константиновым палемдыман. Мутат уке, эн чолгаже – Владимир Мосолов.
«Шке гыч тӱҥалман»
– Кӱлынак тиде вид дене 2015 ий сентябрьыште заниматлаш тӱҥалынам. Лач тунам олаште Воркаут площадкым почыныт. Рвезе-влакын тренировкым ыштымыштым ужынам да пеш келшен. «Нуно тыге кертыт гын, мыят кертам» шоналтенам семынем тунам. Кап-кылым пеҥгыдемдыме шотышто (воркаут, фристайл) сай кӱкшытыш шуынам, шонем. Тыште сай коллектив, икте-весе дене пайдале кутырымаш, поро шӱлыш озалана. Мо эше айдемылан кӱлеш. Спорт дене кылым кучыза, тазалыкдам аралыза. Шке кап-кылым пеҥгыдемдаш куштылго паша огыл. Илышыштыда иктаж-мом вашталтымыда шуэш гын, шке гыч тӱҥалман. Таза илыш-йӱлам кучышо айдеме молыланат сай пример лиеш. Тыге лишылет-влакланат полшет. А самырык тукым – мемнан ончыкылыкна. Ончыкылыкна таза да пеҥгыде лиеш гын, элнат ӱшанле да пеҥгыде лиеш, – манеш Дмитрий Адиганов.
Е.Эшкинина.
Снимкылаште:
