Шукерте огыл Ульяновск оласе И.А.Гончаров лӱмеш историй-мемориал рӱдер-тоштерыште Марий Элын Т.Евсеев лӱмеш калыкле тоштержын ончерже почылтын.
Тудо «Марий-влакын Юл гыч Урал марте эртыме караван корнышт» маналтеш. Ончерым почмаште Ульяновск областьын искусство да тӱвыра политик министрже Е.Сидорова, И.А.Гончаров лӱмеш областной краеведений тоштерын директоржо Ю.Володина, Ульяновск областьын Мордва калыкле-тӱвыра автономийжым вуйлатыше В.Софонов лийыныт. Мемнан делегацийым Т.Евсеев лӱмеш калыкле тоштер директорын алмаштышыже Т.Марьинская вуйлатен да мутым ойлен. Ончерым почмо меропрятийым Ульяновск областьысе Калык творчество рӱдерын «Дети солнца» куштышо йоча ансамбльже сӧрастарен.
Вара марий тоштерын пашаеҥже-влак — директорын науко шотышто алмаштышыже Д.Ефремова да этнографий пӧлкам вуйлатыше Д.Байдимиров — Марий Эл гыч намийыме экспозиций дене палдареныт, экскурсийым, «Ме пӧртым чоҥена» лӱмын ямдылыме образовательный программым эртареныт.
Вес регионышто тыгай ончерым эртараш пуымо йӧн — тиде Юл кундем федерал округысо тоштер-влак советын ваш келшен пашам ыштыме кышкарысе паша лектышыже. Ончер 20 январь марте шуйна.
С.Носова.
Фотом тоштерын сайтше гыч налме.
