Марий Элысе Общероссийский калык фронтын чолга еҥже-влак Параньга посёлкышто «Комфортан оласе средам формироватлымаш» проектын шукталтмыжым тергеныт.
Райрӱдыштӧ посёлкышто илыше калыкын йодмыж почеш йолын вончымо кок кӱварым олмыктымо, ончыкыжым Тукай уремысе обелиск кумдыкыш асфальтым пышташ палемдыме. Контрактым ыштыме деч вара Гайсин уремысе 5-ше, 6-шо, 7-ше да 9-ше №-ан пӧрт-влакын кудывечыштым тӱзаташ тӱҥалыт.
ОНФ-ын экспертше-шамыч палемдыме кумдыклам тӱзатыме проектым онченыт, тӱшка погынымашын протоколжо-влакым тергеныт, йолын вончымо ик кӱварым олмыктымо качествым акленыт. Рейд годым фронтовик-влак посёлкысо калык денат мутланеныт. Верысе-шамычын палемдымышт почеш, муниципалитетым вуйлатыше-влак кумылыштым шотыш налыныт, сандене ынде корем гоч вончаш палынак йӧнан лийын. Но ОНФ-ын чолга еҥже-влак кӱварым лӱдыкшыдымыракым ыштышашлан эше кучемым пеҥгыдемдаш да калык коштмо верыш кечалтше кукшо пушеҥгым кораҥдаш темленыт. Район администрацийын пашаеҥже-влак нине ситыдымашым лишыл жапыште кораҥдаш сӧреныт.
Тергыше-влакын кумылыштым кудывече кумдыкым тӱзаташ палемдыме паша волтен, вет тудым эше тӱҥалмат огыл. Верысе чиновник-шамычын умылтарымышт почеш, кеҥеж мучко конкурсым ик гана веле огыл увертарыме гынат, подрядчик-шамыч лектын огытыл. Амалже – чыла пашалан ик смете. Тыге гынат, таче кечылан аукцион эртен, кызыт контракт ышталтеш.
«Тыгай сынан ситыдымаш Параньга районышто веле огыл палдырна, сандене тиде йодыш дене кылдалтше пашам мучаш марте шукташ тӱҥалына», – палемден Марий Элыште оласе средам тӱзатыме мониторинг шотышто рӱдерын координаторжо Валентин Севастьянов.
М.ИВАНОВА.
