СОЦИАЛ ИЛЫШ

Ольга Пухова:«Мый сайын илем…»

Оршанке районысо Нужавлак школын индешымше классыштыже индеш ӱдыр-рвезе шинчымашым пога, нунын кокла гыч иктыже – Ольга Пухова. 

Ӱдыр – шочынак инвалид. Врач-влак йочалан «ДЦП» диагнозым шынденыт. Индеш ий ончыч икымше сентябрьыште Ольга иктаҥаш ӱдыр-рвезе-шамыч дене пырля икымше гана икымше классыш каен. Кок ият пеле гыч коштын кертдыме лийын да У ий деч вара Марий Эл Республикын шинчымашым пуышо «Бауманский лицей» кугыжаныш автономный тӧнежше пеленсе Инвалид йоча-влакым дистанционно туныктымо рӱдер полшымо дене мӧҥгыштыжӧ шинчымашым погаш тӱҥалын. Ӱдырлан тазалыкыште экшык улман йоча-влакым дистанционно туныктымо йӧнын кокымшо модельжым темленыт. Сай шинчымашым налын кертше манын, тунемме жаплан компьютер оборудованийын комплектшым ойыреныт, Интернет сеть дене пайдаланаш йӧным ыштеныт – чылт яра. Кызыт Ольга деке Нужавлак школ гыч вич туныктышо кандаш предметым туныкташ коштеш, а Интернет полшымо дене Шернур, Оршанке посёлкыласе, Йошкар-Оласе школлаште туныктышо-влакын куд предметыштым дистанционно налеш.

– Ольга арняште 21 занятийым эрта. Тыршыше ӱдыр. Икымше чырыкыште улыжат ик кумытанже лекте, – тунемшыж нерген класс вуйлатыше Любовь Чепайкина моткоч порын ойла. – Шкеже руш йылме ден сылнымутым туныктем. Ольга деке арняште куд гана коштам, сандене тудын чыла кумылжым сайын шижам, шонымашыжым палем.

Ольга класс вуйлатышыжым туныктышо семын веле огыл, кугурак акаж гаят ужеш, коеш. Фотоаппаратым лукмем ужын, Любовь Петровна деч ӱпшым сайын шераш але резинкыш погаш йодо – ӱшана.

– «Химий – неле предмет» манмым колынам… Мый ала дистанционно тунемам, ала тептерем ок сите да тиде предмет дене виянжак омыл, – химий дене лекше кумытанжын амалжым мужедеш Ольга. – Шкеже гуманитарий улам манын шонем. Историй предмет чот келша. Российын, тыгак моло элын илыш корнышт нерген утларак да утларак пален налнем. Тидын шотышто тӱрлӧ литературым лудаш, оҥай передачым ончаш йӧратем.

Кумданрак — «Марий Эл» газетын
2017 ий 9 декабрьыште лекше номерыштыже лудын кертыда.

Маргарита ИВАНОВА.
Авторын фотожо.

Опубликовать в Одноклассники

Добавить комментарий