27 август гыч 5 сентябрь марте Волжский районысо Пӧтъял школын «Олимпия» футбол командыже Волгоградыште «Шӱштӧ мече» всероссийский турнирыште Марий Элын чапшым арален. 70 команде кокла гыч тудо 39-ше вер дене пӧртылын.
Тений «Шӱштӧ мече» турнирыште чылаже 700 утла тунемше вийжым терген. Регион кӱкшытыштӧ «Луч» (Краснооктябрьский посёлко), «Спутник» (Оршанке), «Волга» (Юрино), «Звезда» (Советский), «Искра» (Кужэҥер район, Йӱледӱр), «Олимпия» (Волжский район, Пӧтъял) модыныт.
Ты гана Волжский район гыч Пӧтъял школын «Олимппия» командыже (15 очко, тренерышт М.Тимофеев) икымше верыш лектын.
– Тыгай таҥасымаште ик йоҥылыш, ик очко – кугу вашталтышым ышта. Мемнан командыланат эшеат сайрак верыш лекшаш верч ик мече ситен огыл, – ойла Мирон Сергеевич. – Икымше модмаште Тула гыч футболист-влаклан 0:1 счёт дене сеҥалтме, Варажым Хабаровск дене модыч. Тӱҥалтыште 1:0 счёт дене ончыко лектыч, сайын модыч, но матч пытыме деч ончыч ничья (1:1) лие. Тидыжак чаракым ыштыш. Варажым рвезе-влак Крым гыч команде дене модыныт, 2:1 счёт дене сеҥен, шке тӱшкаште кумшо верыш лектыныт.
Моло кечылаште «Олимпия» команде Ставрополь, Барнаул, Калининград, Пермь, Волгоград гыч футболист-шамыч дене вашлийын. Сеҥенытат, ничьямат ыштеныт, модынат колтеныт. Лийын куан модмашат, шинчавӱдат йоген. Но тыгай турнир марий рвезе-влаклан шуко жаплан поро шарнымашым кода. Яра жапыштышт нуно йӱштылыныт, экскурсий денат лектыныт, верысе кундем дене палыме лийыныт.
Спорт мероприятийым Мамаев Курган чапкӱ воктене торжественно почыныт. Тидыжат шкешотан пайрем шӱлышым пуртен, тыршаш кумылым луктын.
Икымше верым Псков гыч «Стрела», кокымшым Нижний Новгород гыч «Премьер лига», кумшо верым Мурманск гыч «Лапландия» команде-влак налыныт.
Е.Эшкинина.
