СПОРТ

Кӧ эн талыже?

Йошкар-Олаште куштылго атлетике дене Радио да Сеҥымаш кече лўмеш пӧлеклалтше эстафете эртыш. Йўлаш пурышо старт Ленин площадьыште 73-шо гана пуалте. Тушто ты гана, тўрлӧ тўшкам шотыш налын, нылле команде вийжым тергыш. Тўҥ шотышто Йошкар-Оласе школлаште, вузлаште, техникумлаште, профучилищылаште тунемше-шамыч, муниципальный районла, ялысе школла гыч, спорт клуб-влак ушненыт.

Мастарлыкышт да писылыкышт дене Йошкар-Оласе 14-ше №-ан гимназий, Бауманский лицей, 15-ше №-ан школ призёр радамыш логалыныт. Чылаже 24 школ гыч команде стартыш лектын.

Икымше тўшкаште верым тыге шотленыт:

  1. «Политехник» спорт клуб (17,08);
  2. МарГУ (17.30);
  3. «Динамо» спорт клуб (18.07);
  4. МОСИ (22.09)

Кокымшо тўшка:

  1. УОР (18.17);
  2. МРМТ (18.24);
  3. ЙОСТ (18.37);
  4. ТТК (22.10)

Кумшо тўшка:

  1. Медведево район (19.01);
  2. Морко район (19.34)

Ялысе школ-влак:

  1. Волжск ола (19.15);
  2. Унчо кыдалаш школ (19.32);
  3. Тошто Торъял школ (20.39).

Ялысе КФК:

  1. Семёновын фермер озанлыкше (Волжский район, 19.37);
  2. «Передовик» ялозанлык артель (Морко район, 20.06);
  3. «Акашевский» сурткайык фабрике (21.38).

 

Ксения Волкова, политалон дене КМС:

– Нылымше этапым «Динамо» командылан куржым. Уло вийым пыштен куржаш тӧчышым. Ямдылалтмет уло гын, изиш куштылгырак. Такшым мыланем 400 ден 800 метр келша. Кызыт эн кўчыкыш финишироватленам.

 

Юлиан Денисов, Волжский район:

– Икымше этапыште индешымше лийым, кок тале соперник ыле. Тўшка гыч лекташ нелырак. Тўҥжӧ – сеҥышна. Кузе тўҥалат, туге пытарет. Такшым мыланем нылымше этапым куржаш, финишироватлаш келша.

Шарнем, Шем теҥыз воктене всероссийский президентский модмаште 1000 метрыште икымше верым налынам. Вучыдымо лийын, шкежат ӧрынам. Пеш куаненам ыле. Тачат тыгак. Мыланем куржталаш келша. Вич ий наре лийже манынак тренироватлалтам. Эрдене, кастене ямдылалтам, кумыл нӧлтеш.

Альберт Аркадьевич Семёнов, Пӧтъял школын ончычсо физрукшо:

– Уста рвезе, талантан, тудлан профессионал тренер кўлеш. Чыла вере шкенжым ончыкта, сай результат дене куандара.

 

Светлана Пайгашева, Морко районысо Унчо школышто физкультурым туныктышо:

– Мемнан кундем гыч кум команде толын, кумынек кокымшо верыш лектыныт.  Школ гыч тунемше-влакым эреак кондаш тыршена. Ончылгоч паленна, сандене ямдылалташ тыршенна. Такшым ончыч шукыж годым икымше верым лектынна… Мый ала-куштыжо йоҥылыш лийынам гын веле? Этапышкат чын шогалтен моштыман. Кажныжлан ой-каҥашым пуыман. Икымше гана стартыш лекшыже изиш ӧрын, тидыжат уло. Тышке толаш мўндыррак. Сандене ты гана ял гыч толшыжо шагал. Тидыже окса денат кылдалтын. Ялозанлык предприятий вуйлатыше Юрий Арсентьевич Игнатьевлан, школ директор Сергей Андропович Григорьевлан умылымыштлан, полшымыштлан тау. Таза илыш-йўла верч вуйын шогат.  

Тыге толмо, стартыш лекме участник-влаклан ваш-ваш ужын кутыраш, мастрлыкым ешараш – сай йӧн.

Александр Сергеев, куштылго атлетике дене спорт мастер, ветеран:

– Мый кызыт фотографироватлаш йӧратем. Весканалан шарнымашеш кодшо, шонем. Тыгай старт гыч тале спортсмен-влак лектыт. Ты гана игече юалгырак, но тиде куржталшылан сай веле. Ончаш толшо шагалрак, но чонжо дене йўлышӧ толшыжо садак спорт пайремым шижын. Тиде эстафете, чынжымак, йўлаш пурышо кугу спорт пайрем.

Е.Эшкинина.

Снимкылаште: старт пуалтын;

Е.Никифорофын фотожо

Опубликовать в Одноклассники

Добавить комментарий