Медицине организаций-влакым тергыме годым южыштлан штрафым пуат. Палынем ыле, тиде окса кушко кая?
И.Смирнова
Йошкар-Ола
Йодышлан Марий Элын Обязательный медицине страхований фондшын директоржым алмаштыше Марина Гурьянова вашешта:
– Обязательный медицине страхований фонд ден страховой медицине организаций-влакын специалистышт медицине тӧнеж-шамычын граждан-влаклан полышым пуымо кугытыштым, жапыштым, качествыштым да йӧныштым контрольышто кучат. Тыгодым нарушений шотан иктаж ситыдымашым рашемдат гын, штрафым пуат. Тиде окса дене Марий Элын Обязательный медицине страхований фондшын нормироватлыме страховой шапашыжым (НСЗ) чумырат.
РФ правительствын пунчалже дене келшышын, ОМС-ын верысе фондшын нормироватлыме страховой шапашыж дене медицине организаций-влак пашаеҥыштлан квалификацийым нӧлтымӧ программе дене ешартыш шинчымашым пуэн, медицине оборудованийым налын кертыт. Тиде документыште штраф оксан кушко кайымыжым радамын ончыктымо.
Мутлан, 2018 ийыште Марий Элын Обязательный медицине страхований фондшын 23090 тӱжем теҥгежым эмлымвер ден поликлинике-влаклан медицине оборудованийым налаш, тыгак нуным олмыкташ кучылтмо.
Мом налме? Йошкар-Оласе больницылан шодыш искусственный вентиляцийым ыштыме аппаратым 830 утла тӱжем теҥгеш налме, Шернур ден У Торъял районласе рӱдӧ больнице-влаклан – 2616 да 1979 теҥгеш ультрайӱкан сканерым пеленысе арвержыге, Республикысе Г.И.Григорьев лӱмеш офтальмологический больницылан – 1167,8 теҥгеш анестезиологий комплексым, В.В.Свинин лӱмеш Марий Турек районысо рӱдӧ больницылан 3650 теҥгеаш тыгаяк комплексым ойырымо. Республикысе клинический больнице 2364 теҥгеаш эндовидеоскопический комплексан лийын, Медведево районысо рӱдӧ больнице – 1807 теҥгеаш ультрайӱкан цифровой диагностический сканеран, Йошкар-Оласе 4-ше №-ан поликлинике – 1114,8 теҥгеаш фиброгастроскопан, Республикысе йоча клинический больнице – 1178,2 теҥгеаш диагнозым шындаш да неврологий черан икшыве-шамычым эмлаш полшышо шуко функциян компьютер комплексан, Оршанке районысо рӱдӧ больнице – 2312 утла теҥгеаш ультрайӱкан портативный диагностический системан, а Кужэҥер районысо рӱдӧ больнице – 2207,5 теҥгеаш ультрайӱкан диагностический аппаратан, Параньга районысо рӱдӧ эмлымвер – 1861 теҥгеаш шуко функциян ультрайӱкан сканеран.
Палемден кодыман, Марий Элын Обязательный медицине страхований фондшын нормироватлыме страховой шапашыж гыч кучылтмо оксам ОМС-ын федеральный фондшо пеҥгыде контрольышто куча.
М.ИВАНОВА
