Калык фронтын рӱдӧ штабшын еҥже, Йошкар-Оласе 29-ше №-ан школын директоржо А.Кузнецов шкем шке пытараш шонышо икшывым ончылгоч кузе шижаш лийме дене кылдалтше пособий-влак кӱлыт манын палемден.
Шукерте огыл Российын Образований да науко министерствыже пеленсе Йочан праважым да интересшым аралыше рӱдер тыгай икшыве-шамыч дене кузе пашам ышташ кӱлмым умылтарыше методике пособийым ямдылен. Нуным регионлашке колтат, а верысе кучем савыктышым школлашке шаркала да социальный педагог, психолог-шамычлан кучыкта.
– Йоча коклаште шкем шке пытарыме случай-влак элыштына вашлиялтыт, санденак тидым чактарен кертше пособий моткоч кӱлешан. Молан манаш гын школлаште тыгай икшыве дене пашам ыштыше специалист шагал але йӧршынат уке. А тиде савыктыш могай-гынат полышым пуа, – каласен А.Кузнецов.
Тудынак мутшо почеш, йочан илыш дене чеверласыме кумылжо ешыште улшо ситуацийлан, школышто улшо умылыдымашлан, удан тунеммылан кӧра лектын кертеш.
Каласыман, «Образований нерген» федеральный закон дене келшышын, педагог икшыве верч мутым куча да йочан шкем шке пытараш шонымашым кораҥдаш полшышаш, туткар ынже лий манын, тудын дене пашам ыштышаш, ача-авалан тыгай лийын кертмым увертарышаш. Садлан туныктышылан, социальный педагоглан, педагог-психологлан икшывын тӱжвал тӱсшым ончен, шкем шке пытараш шонышо икшывым ужын, кумылыштым шижын мошташ туныктышо пособий моткоч кӱлеш.
Л.ШАБДАРОВА.
